https://mail.innews.az/uploads/news/
Oktyabrın 7-də Azərbaycan Dövlət Pedaqoji Universitetində (ADPU) 2026-2027-ci tədris ili üzrə doktorantura səviyyəsinə qəbul olunan şəxslərlə görüş keçirilib.
Görüşün əsas məqsədi doktorantların elmi fəaliyyətə adaptasiyasına dəstək olmaq, universitetdə onlar üçün yaradılmış imkanlar, elmi rəhbərlərlə iş prinsipləri, tədqiqat fəaliyyətinin təşkili və beynəlxalq əməkdaşlıq istiqamətləri barədə ətraflı məlumat vermək olub.
Görüşdə çıxış edən ADPU-nun rektoru professor Cəfər Cəfərov universitetdə son illər elmi-tədqiqat istiqamətində həyata keçirilən işlər və əldə olunan nəticələr barədə danışıb. Rektor doktorantura mərhələsinin gənc tədqiqatçıların elmi dünyagörüşünün formalaşması, müstəqil araşdırma aparmaq bacarıqlarının inkişaf etdirilməsi və gələcək elmi fəaliyyətlərinin istiqamətləndirilməsi baxımından mühüm mərhələ olduğunu bildirib. Professor Cəfər Cəfərov qeyd edib ki, müasir elmi mühitdə doktorantlardan yalnız dissertasiya üzərində işləmək deyil, eyni zamanda elmi nəticələrini beynəlxalq akademik mühitdə təqdim etmək, müxtəlif tədqiqat platformalarında fəal iştirak etmək və elmi əməkdaşlıq əlaqələrini genişləndirmək tələb olunur. Bu baxımdan ADPU-da doktorantların elmi fəaliyyətinin dəstəklənməsi, onların müasir elmi resurslara çıxışının təmin edilməsi və tədqiqat imkanlarının genişləndirilməsi istiqamətində məqsədyönlü işlər aparılır. Rektor universitetin zəngin elmi kitabxana fondunun, elektron elmi resursların, və müxtəlif elmi layihələrin doktorantların tədqiqat fəaliyyəti üçün mühüm imkanlar yaratdığını vurğulayıb. O, doktorantları elmi fəaliyyətə məsuliyyətli yanaşmağa, tədqiqatlarını sistemli və ardıcıl şəkildə aparmağa, əldə etdikləri nəticələri nüfuzlu elmi nəşrlərdə dərc etdirməyə və beynəlxalq elmi tədbirlərdə iştirak etməyə çağırıb.
ADPU-nun elm və innovasiyalar üzrə prorektoru professor Asəf Zamanov çıxışında 2026-2027-ci tədris ili üzrə doktoranturaya qəbul prosesi barədə ətraflı məlumat verib. Bildirib ki, plan üzrə nəzərdə tutulmuş ixtisaslar üzrə fəlsəfə doktoru proqramı üzrə doktoranturaya 39 iddiaçının sənədləri qəbul edilib və ADPU-nun Sənəd Qəbulu Komissiyasının müvafiq qərarına əsasən həmin şəxslər qəbul imtahanlarına buraxılıblar. Prorektor qeyd edib ki, müvafiq ixtisaslar üzrə fəlsəfə doktoru proqramı üzrə doktoranturaya namizədlərin xarici dil imtahanları mərkəzləşdirilmiş qaydada Dövlət İmtahan Mərkəzi tərəfindən keçirilib. İmtahanlarda iştirak edən 39 namizəddən 21-i xarici dil üzrə tələbi uğurla yerinə yetirib. Daha sonra “Fəlsəfə” fənni üzrə qəbul imtahanı keçirilib və 21 namizəddən 20-si imtahandan müvəffəqiyyətlə keçib. Asəf Zamanov doktorantura səviyyəsinin gənc tədqiqatçıların elmi məktəbinin formalaşdığı mühüm inkişaf mərhələsi kimi dəyərləndirilməli olduğunu bildirib. O, doktorantların tədqiqat mövzularına müasir elmi yanaşmalar tətbiq etməsinin, araşdırmalarını beynəlxalq elmi tendensiyalarla uzlaşdırmasının və əldə etdikləri nəticələri elmi ictimaiyyətə təqdim etməsinin vacibliyini diqqətə çatdırıb. Prorektor, həmçinin doktorantların beynəlxalq konfrans, simpozium və digər elmi tədbirlərdə iştirakının, elmi məqalələrinin nüfuzlu beynəlxalq jurnallarda dərc edilməsinin onların akademik inkişafında mühüm rol oynadığını vurğulayıb. A.Zamanov ADPU-nun xarici universitet və elmi-tədqiqat mərkəzləri ilə mövcud əməkdaşlıq əlaqələrinin doktorantlar üçün yeni tədqiqat imkanları yaratdığını, beynəlxalq layihələrdə iştirakın isə onların elmi təcrübəsinin genişlənməsinə şərait yaratdığını qeyd edib.
Magistratura və doktorantura şöbəsinin müdiri Rəşad Sadıqov qəbul mərhələsinin təşkilati tərəfləri, doktorantların elmi rəhbərlərlə iş prinsipləri, dissertasiya mövzularının seçilməsi və təsdiqi, elmi fəaliyyətin planlaşdırılması və qarşıda duran əsas vəzifələr barədə geniş təqdimatla çıxış edib. O, doktorantların tədqiqat prosesini mərhələli və planlı şəkildə təşkil etməsinin, müəyyən olunmuş tələblərə vaxtında əməl etməsinin əhəmiyyətini diqqətə çatdırıb.
Görüşün sonunda doktorantların sualları cavablandırılıb, onların təklif və fikirləri dinlənilib.
Ən son xəbərləri səhifəmizdən də izləyin
