Yeni qəbul olunmuş tələbələr Heydər Əliyev dərslərində

Azərbaycan Dövlət Pedaqoji Universitetinin (ADPU) Heydər Əliyev Mərkəzinin təşkilatçılığı ilə ənənəvi olaraq keçirilən “Heydər Əliyev dərsləri” 2026/2027-ci tədris ilində də davam etdirilir. Artıq dördüncü ildir ki, təşkil olunan və birinci kurs tələbələrini əhatə edən dərslərin 9 oktyabrda baş tutan növbəti məşğələsində Tarix və coğrafiya fakültəsinin tələbələri iştirak edib.

Tarix və coğrafiya müəllimliyi ixtisası tələbələrinin qatıldığı dərs Mərkəzin müdiri Tahir Süleymanovun məruzəsi ilə başlayıb. Məruzəçi Ulu Öndərin Azərbaycan tarixindəki yeri və rolu haqqında çıxış etdikdən sonra dünyanın görkəmli dövlət xadimlərinin Heydər Əliyev haqqında söylədikləri fikirlər slayd şəklində nümayiş olunub.

Dərsin növbəti hissəsi ekskursiya formatında davam edib. Mərkəzin mütəxəssisi Tərlan Ağayev tələbələrə burada nümayiş olunan eksponatlar, arxiv sənədlərinin surətləri və fotoşəkillər haqqında ətraflı məlumat verib.

Daha sonra iştirakçılar H.Əliyevin həyat və fəaliyyətinə, zəngin siyasi irsinə həsr olunmuş sənədli filmi izləyiblər. Dərsin son hissəsində tələbələrə mövzu ilə bağlı suallar təqdim olunub, qarşılıqlı sual-cavab və diskussiya aparılıb.

Qeyd edək ki, “Heydər Əliyev dərsləri“ tədris ili müddətində universitetin müxtəlif fakültə və qruplarında mütəmadi olaraq davam etdiriləcək.