https://mail.innews.az/uploads/news/2026-10/_innews_baac71d2d3f56bbc2465e0854_o.jpg
Muzey Mərkəzində görkəmli xalçaçı-rəssam, ornamentalist və tədqiqatçı Lətif Kərimovun anadan olmasının 120 illiyinə həsr olunmuş sərgi keçirilib.
"innews media" xəbər verir ki, tədbirdə mədəniyyət nazirinin müavini Səadət Yusifova, Azərbaycanın Xalq rəssamları Aydın Rəcəbov və Arif Hüseynov, Əməkdar rəssam Məhəmmədhüseyn Hüseynov, eləcə də digər qonaqlar iştirak ediblər.
Sərgidə Lətif Kərimovun Azərbaycan xalçaçılıq sənətinin inkişafına verdiyi töhfələr, milli ornamentlərin öyrənilməsi, sistemləşdirilməsi və təbliği istiqamətində həyata keçirdiyi işlər diqqətə çatdırılıb. Tədbirin bədii proqramı çərçivəsində musiqi nömrələri də təqdim olunub.
Sərgidə əsərləri ilə təmsil olunan gənc rəssamlar tədbirin onlar üçün əhəmiyyətindən, yaradıcılıq təəssüratlarından və xalça sənətinə maraqlarından danışıblar.
Gənc rəssam Könül Ramazan sərgi haqqında məlumatı sosial şəbəkələr vasitəsilə əldə etdiyini və tədbirdə iştirak etməyi qərara aldığını bildirib:“Sərgiyə öz konseptual layihələrimdən biri ilə qatılmışam. Təəssüratlarım çox gözəldir. Çünki bu sərgi Azərbaycan xalça sənətinin banilərindən biri, dekorativ-tətbiqi sənətimizin inkişafında özünəməxsus iz qoymuş və sənət ənənələrini gələcək nəsillərə ötürmüş Lətif Kərimovun 120 illik yubileyinə həsr olunub. Buna görə də burada iştirak etməyi özüm üçün çox vacib hesab etdim. Bu, mənim ilk sərgimdir və inanıram ki, bundan sonra daha böyük sərgilərdə də iştirak edəcəyəm”.
Gənc rəssam Azər Əlizadə isə sərgidə iştirak etmək üçün seçilməsindən məmnunluğunu ifadə edib. O, “Yağmur duası” adlı əsəri ilə sərgidə təmsil olunduğunu bildirib:“Çox xoşbəxtəm ki, bu sərgidə iştirak etmək üçün seçilmişəm. Lətif Kərimovun 120 illiyinə həsr olunmuş sərgidə qrup yoldaşlarımla bir araya gəlmək, eyni sənət mühitini paylaşmaq mənim üçün xüsusi hissdir. Yaxşı ki, bu sərginin bir parçası olmuşam!”
Gənc rəssam Asudə Nəcəfova sərginin onda müsbət təəssüratlar yaratdığını qeyd edib. Onun sözlərinə görə, bu, iştirak etdiyi ikinci və ya üçüncü sərgidir. Rəssam burada “Eşqin” adlı əsəri ilə təmsil olunur. Xalçaçılıq sənətinə marağının akademiyaya qəbul olunduqdan sonra daha da artdığını deyən Asudə Nəcəfova bildirib ki, əvvəllər xalçanı əsasən məişətdə istifadə olunan, istilik və rahatlıq yaradan bir əşya kimi qəbul edib. Zaman keçdikcə onun daha dərin məna daşıdığını anlayıb: “Xalçanın tarixi özündə əks etdirən, sirli simvolları qoruyub saxlayan bir kitabə olduğunu kəşf etdim. Məhz bundan sonra xalça sənəti mənim üçün xüsusi əhəmiyyət qazandı. Bu sənəti öyrənməyə və fəaliyyətimi bu istiqamətdə davam etdirməyə həvəslə yanaşıram”.
Digər gənc rəssam Müşgünaz Nəcəfova da sərgidə iştirakını yaradıcılığı baxımından mühüm uğur hesab etdiyini bildirib. O qeyd edib ki, belə sərgilər rəssamların tanınmasına, əsərlərinin daha geniş auditoriyaya təqdim olunmasına və sənət adamları arasında yaradıcılıq əlaqələrinin qurulmasına şərait yaradır.
“ “Ləçək Türünc” əsərimlə qatılmışam. Bu sərgidə iştirak etmək mənim üçün böyük uğurdur. İnanıram ki, böyük nailiyyətlərə aparan yol məhz belə sərgilərdən keçir. Bu cür tədbirlər vasitəsilə tamaşaçılar yaradıcılığımızla daha yaxından tanış olur, biz isə əsərlərimizi sənətsevərlərə canlı şəkildə təqdim etmək imkanı qazanırıq”, – deyə Müşgünaz Nəcəfova vurğulayıb.
Qeyd edək ki, Lətif Kərimov Azərbaycan xalçaçılıq sənətinin öyrənilməsi, sistemləşdirilməsi və beynəlxalq miqyasda tanıdılması istiqamətində mühüm xidmətlər göstərib. Onun zəngin yaradıcılığı və elmi fəaliyyəti milli dekorativ-tətbiqi sənətin inkişafında xüsusi yer tutur.
Ən son xəbərləri səhifəmizdən də izləyin
