https://mail.innews.az/uploads/news/2026-10/_innews_7e3da14c9840b2bcf06f39df4_o.jpg
Layihə çərçivəsində Naxçıvan, Qarabağ və Gəncə regionlarında gənclər üçün təlimlər və debat turniri təşkil olunub.
Layihənin açılış mərhələsində iştirakçılara təşəbbüsün məqsədləri, əsas fəaliyyət istiqamətləri və nəzərdə tutulan mərhələlər barədə ətraflı məlumat verilib. Açılış tədbiri çərçivəsində təşkil olunan panel müzakirələrində xüsusi qonaqlar iqlim dəyişmələri, ekoloji fərqindəliyin artırılması, ətraf mühitin qorunmasında fərdi və ictimai məsuliyyət, eləcə də gənclərin ekoloji problemlərin həllində rolu haqqında fikirlərini bölüşüblər.
Layihənin təlim mərhələsi çərçivəsində tələbələrin natiqlik, nitq, təqdimat və debat bacarıqlarının inkişafına yönəlmiş təlimlər keçirilib. “Natiqlik və nitq bacarıqlarının inkişafı” mövzusunda təşkil olunan təlimlərdə iştirakçılara effektiv ünsiyyətin əsas prinsipləri, fikirlərin aydın və ardıcıl ifadə olunması, auditoriya qarşısında özünü düzgün təqdimetmə, inandırıcı çıxış və təqdimat bacarıqları barədə praktiki biliklər verilib.
Bununla yanaşı, “Debat strukturu və metodologiyası” adlı təlimlərdə debatın əsas prinsipləri və strukturu, arqumentlərin qurulması, mövqenin əsaslandırılması, qarşı tərəfin arqumentlərinə münasibət bildirilməsi və müzakirələr zamanı effektiv çıxış üsulları izah olunub. Təlimlərin praktiki hissəsində iştirakçılar debat oyunları vasitəsilə əldə etdikləri bilik və bacarıqları tətbiq etmək imkanı qazanıblar.
Layihənin növbəti mərhələsi olan debat turniri çərçivəsində tələbələr iqlim dəyişmələri və ekoloji məsələlərlə bağlı mövzular ətrafında müzakirələr edərək öz mövqelərini əsaslandırıb, arqumentlərini təqdim ediblər. Turnir gənclərin ekoloji problemlər barədə məlumatlılığının artırılmasına, komanda işi bacarıqlarının inkişafına töhfə verib.
Qeyd edək ki, “İqlim dəyişmələri mövzusunda debatların təşkili” layihəsi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi və BP Azərbaycan şirkətinin birgə maliyyə dəstəyi, “Vətəndaş Cəmiyyətində Debat” İctimai Birliyinin təşkilatçılığı ilə həyata keçirilib.
Ən son xəbərləri səhifəmizdən də izləyin
