https://mail.innews.az/uploads/news/2026-10/_innews_75c6c754b3b29a49f6e5e84a0_o.jpg
Azərbaycanın Uşaq Avroviziyası təmsilçisi Yağmur oktyabrın 23-də yeni “One Voice” mahnısına çəkilmiş klipini təqdim edib.
Dramatik pop ballada janrında olan mahnı sülhə, birliyə, təbiətin qorunmasına və daha gözəl gələcəyə həsr olunub. “One Voice” fərqliliklərimizə baxmayaraq, hamımızın eyni dünyanı paylaşdığımızı və onun gələcəyi üçün ortaq məsuliyyət daşıdığımızı xatırladır.
Mahnının maraqlı tarixçəsi var. “One Voice” ötən il Uşaq Avroviziyasında Azərbaycanı təmsil etmək üçün Yağmura təklif olunan əsərlərdən biri olub. Layihənin ideya müəllifi, prodüseri və bəstəkarı Tofiq Hacıyev mahnıda musiqinin insanları birləşdirən gücünü ön plana çıxarıb. Mahnının sözləri Səttar Temuçinə məxsusdur.
Klipin rejissoru Cavanşir Eladısoydur. Uzun illər Kanadada fəaliyyət göstərmiş rejissor ekran işində minimalist və simvolik vizual üsluba üstünlük verib.
Klipdə Yağmurla yanaşı, 17 uşaq rəqqas iştirak edir. Xüsusi hazırlanmış xoreoqrafiya və səhnə quruluşları vasitəsilə birlik, həmrəylik və sülh ideyaları vizual dildə təqdim olunur.
Ekran işinin maraqlı məqamlarından biri də Yağmurla ötən il Uşaq Avroviziyası səhnəsini bölüşən üç rəqqasın yenidən onunla birlikdə kamera qarşısına keçməsidir.
“One Voice” musiqi və vizual sənətin dili ilə insanları ortaq dəyərlər ətrafında birləşməyə çağırır. Layihənin əsas mesajı sadədir: Bir səs belə böyük dəyişikliklərin başlanğıcı ola bilər.
Klip oktyabrın 23-də ictimaiyyətə təqdim olunub.
Ən son xəbərləri səhifəmizdən də izləyin
