https://mail.innews.az/uploads/news/2026-10/_innews_f25f5170f23cfc13ccf40bd5a_o.jpg
Ginekomastiya kişilərdə süd vəzi toxumasının böyüməsi ilə müşahidə olunan və əsasən estrogenlə testosteron hormonları arasındakı tarazlığın pozulması nəticəsində yaranan vəziyyətdir. Bu hal müxtəlif yaşlarda meydana çıxa bilər. Ginekomastiyanın yaranmasına hormonal dəyişikliklər, bəzi dərman preparatları və müəyyən sağlamlıq problemləri səbəb ola bilər. Əsas əlamətləri sinə nahiyəsində böyümə, şişkinlik, ağrı və həssaslığın artmasıdır. Müalicə üsulu vəziyyətin səbəbindən və ağırlıq dərəcəsindən asılı olaraq müəyyən edilir. Bəzi hallarda dərman müalicəsi tətbiq olunsa da, süd vəzi toxumasının nəzərəçarpacaq dərəcədə böyüdüyü hallarda cərrahi müdaxilə tələb oluna bilər. Buna görə də ginekomastiya əlamətləri olan şəxslərin həkimə müraciət etməsi vacibdir.
Ginekomastiya əməliyyatları Xəstəliklərin Beynəlxalq Təsnifatının 9-cu baxışının Klinik Modifikasiyası (XBT-9-KM) üzrə kodlaşdırılıb.
Belə ki, XBT-9-KM üzrə 85.31 koduna uyğun “Birtərəfli reduksiya mammoplastikası (birtərəfli ginekomastiya)” və 85.32 koduna uyğun “İkitərəfli reduksiya mammoplastikası (ikitərəfli ginekomastiya)” əməliyyatları icbari tibbi sığortaya daxildir.
Səhiyyə Nazirliyindən verilən məlumata görə bu əməliyyatlar müvafiq həkimin təyinatı və tibbi göstəriş əsasında M.A.Topçubaşov adına Elmi Cərrahiyyə Mərkəzi, Əziz Əliyev adına Azərbaycan Dövlət Həkimləri Təkmilləşdirmə İnstitutu nəzdində fəaliyyət göstərən Plastik və Rekonstruktiv Cərrahiyyə Klinikası, ATU-nun Tədris Cərrahiyyə Klinikası, Bakı Sağlamlıq Mərkəzi, Kliniki Tibbi Mərkəz, Xətai Tibb Mərkəzi, M.Ə. Mirqasımov adına Respublika Klinik Xəstəxanası, Abşeron Rayon Mərkəzi Xəstəxanası, Sumqayıt Tibb Mərkəzi, Ağsu Rayon Mərkəzi Xəstəxanası və Şəki Rayon Mərkəzi Xəstəxanasında icbari tibbi sığorta ilə ödənişsiz həyata keçirilir:
Qeyd edək ki, 27 iyun 2024-cü ildə Azərbaycanda ilk dəfə Nərimanov Tibb Mərkəzinin nəzdində fəaliyyət göstərən Yanıq Mərkəzinin Plastik rekonstruktiv cərrahiyyə şöbəsində icbari tibbi sığortanın Xidmətlər Zərfi çərçivəsində “Ginekomastiya” diaqnozu üzrə “Ginekomastiyanın ləğvi” əməliyyatı icra olunub.
Vüsal
Ən son xəbərləri səhifəmizdən də izləyin
