https://mail.innews.az/uploads/news/2026-11/_innews_c50c71e98fedeb5915b41e2b0_o.jpg
Azərbaycanda bir neçə qarın boşluğu orqanının eyni əməliyyat zamanı köçürülməsini nəzərdə tutan multivisseral transplantasiyanın tətbiqi ilə bağlı hazırlıqlar davam etdirilir.
Hazırda ölkədə böyrək, qaraciyər və ürək transplantasiyası, həmçinin buynuz qişa və sümük iliyi transplantasiyası həyata keçirilir. Bundan əlavə, 2027-ci ildən etibarən ağciyər və ürək-ağciyər kompleksi transplantasiyalarının həyata keçirilməsi planlaşdırılır.
Mövcud qanunvericilik isə mədə, mədəaltı vəzi və bağırsaqlar da daxil olmaqla bir sıra orqanların meyit donordan transplantasiya məqsədilə götürülməsinə hüquqi imkan yaradır.
Multivisseral transplantasiya eyni əməliyyat zamanı bir neçə qarın boşluğu orqanının, o cümlədən mədə, mədəaltı vəzi və bağırsaqların transplantasiyasını nəzərdə tutur. Bu üsul xüsusilə bir neçə həyati orqanın ciddi şəkildə zədələndiyi və ayrı-ayrı orqan transplantasiyasının kifayət etmədiyi xəstələrin müalicəsində tətbiq olunur.
Məlumata görə, Azərbaycanda multivisseral transplantasiyanın ilk dəfə 2028-ci ildə həyata keçirilməsi planlaşdırılır.
Beləliklə, ölkədə transplantasiya proqramının genişləndirilməsi istiqamətində ağciyər və ürək-ağciyər kompleksi transplantasiyalarından sonra multivisseral transplantasiyanın da tətbiqinə başlanması nəzərdə tutulur.
Vüsal Artyom
Ən son xəbərləri səhifəmizdən də izləyin
