https://mail.innews.az/uploads/news/2026-11/_innews_5ed8f03c7ae1f088add7a3210_o.jpg
4 noyabr tarixində İrəvan Dövlət Azərbaycan Dram Teatrında Bakı İstanbul Liseyinin təşkilatçılığı ilə 8 Noyabr – Zəfər Gününə həsr olunmuş təntənəli tədbir keçirilib.
Azərbaycan xalqının tarixi zəfərinə və şəhidlərimizin əziz xatirəsinə həsr olunan tədbirdə lisey şagirdləri rəngarəng bədii kompozisiyalarla çıxış ediblər.
Tədbir çərçivəsində şagirdlərin ifasında xor nümunələri, vətənpərvərlik ruhlu musiqi və rəqs kompozisiyaları təqdim olunub.
Proqramın diqqətçəkən hissələrindən biri Zəfər mövzusuna həsr edilmiş səhnə əsəri olub. Tədbirin bədii proqramında xüsusi yer tutan tamaşa quruluşçu rejissor Ülvi Məmmədlinin yaradıcı yanaşması ilə hazırlanıb. Səhnə əsərində Vətən sevgisi, mübarizə əzmi, milli birlik, qəhrəmanlıq və Zəfərin gələcək nəsillərin yaddaşında yaşadılması ideyaları bədii ifadəsini tapıb.
Rejissor Ülvi Məmmədli bu tamaşada “Uşaqlar Zəfəri yalnız eşitməməli, onu hiss etməlidirlər” şüarını irəli çəkib.
Rjissor tədbirin və səhnə işinin əhəmiyyətini belə dəyərləndirib:
"Tədbirin təşkilatçısı, liseyin təşkilati işlər üzrə direktor müavini Vüsalə Əliyeva proqramın ərsəyə gəlməsində mühüm rol oynayıb. Tədbirin daha dolğun, rəngarəng və yaddaqalan olması üçün göstərdiyi təşkilati səylər, müəllim və şagirdlərin fəaliyyətinin əlaqələndirilməsi, yaradıcı prosesə verdiyi dəstək tədbirin ümumi ahənginə xüsusi töhfə verib. Məncə, uşaqlar üçün teatrın ən böyük üstünlüklərindən biri onların hadisələri sadəcə izləməsi deyil, həmin hadisələrin içərisinə daxil olaraq obrazlar vasitəsilə onları dərk etməsidir. Bu baxımdan, belə tamaşalar uşaqlarda həm emosional həssaslığın, həm yaradıcılıq qabiliyyətinin, həm də milli-mənəvi dəyərlərə bağlılığın formalaşmasına töhfə verir.
Mənim üçün bu işin ən maraqlı tərəfi şagirdlərin prosesə münasibəti, səhnədə özlərini ifadə etmək həvəsi və mövzuya göstərdikləri maraq idi. İstəyirdim ki, tamaşa bitdikdən sonra onların yaddaşında sadəcə səhnələr deyil, bir fikir qalsın: Zəfər böyük bir xalqın iradəsinin, birliyinin və mübarizəsinin nəticəsidir”.
Bakı İstanbul Liseyinin direktoru Hüseyn Həsənov sonda səhnəyə çıxaraq bu qəbildən olan tədbirlərin şagirdlərin hərtərəfli inkişafında, onların dünyagörüşünün genişlənməsində, milli-mənəvi dəyərlərə bağlılığının güclənməsində və yaradıcı potensiallarının üzə çıxmasında mühüm əhəmiyyət daşıdığını vurğulayıb. O, tədbirin hazırlanmasında əməyi olan müəllimlərə, fəal iştiraklarına görə şagirdlərə və göstərdikləri dəstəyə görə valideynlərə təşəkkürünü bildirib.
Qeyd edək ki, tədbirin xoreoqrafı Amil Əhmədov, xormeysteri isə Süsən Orucovadır.
Ən son xəbərləri səhifəmizdən də izləyin
