https://mail.innews.az/uploads/news/2026-11/_innews_491010e05dd04708233593cff_o.jpg
8 Noyabr – Azərbaycanın Zəfər Günü münasibətilə “Zəfər Salnaməsi” adlı tədbir keçirilib.
Tədbir Azərbaycan Respublikası Gənclər Təşkilatları Milli Şurasının məkan dəstəyi, “Müasir Gənclərin İnkişafına Dəstək” İctimai Birliyinin tərəfdaşlığı və “Əbədi Birlik” Gənclər İctimai Birliyinin təşkilatçılığı ilə baş tutub.
Tədbirin əsas məqsədi Azərbaycanın şanlı Zəfər tarixini gənc nəslə daha yaxından tanıtmaq, Vətən uğrunda mübarizə aparmış qəhrəmanlarımızın şücaətini ehtiramla yad etmək, milli vətənpərvərlik ruhunu gücləndirmək və Zəfər tarixinin canlı şahidləri ilə gənclər arasında fikir mübadiləsi aparmaq olub.
Görüş çərçivəsində Azərbaycanın Vətən müharibəsində qazandığı tarixi Qələbə, Zəfərə aparan yol, qəhrəmanlarımızın fədakarlığı, dövlət-xalq-ordu birliyi və bu tarixi günün milli yaddaşımızdakı əhəmiyyəti ətrafında söhbətlər aparılıb.
Tədbirin qonaqları Azərbaycan Respublikası Müdafiə Nazirliyinin Xüsusi Təyinatlı Qüvvələrinin (XTQ) ehtiyatda olan polkovnik-leytenantı Nizami Əliyev, Azərbaycanın tanınmış televiziya aparıcısı və jurnalisti Jalə Həsənli, eləcə də əməkdar jurnalist, hüquq müdafiəçisi və ictimai xadim Azər Həsrət olublar.
Qonaqlar öz təcrübələrini, müşahidələrini və Zəfər tariximizlə bağlı düşüncələrini gənclərlə bölüşüb, iştirakçıların suallarını cavablandırıblar. Görüş zamanı Vətən müharibəsinin tarixi əhəmiyyəti, qəhrəmanlıq salnaməmiz və bu qələbənin gələcək nəsillər üçün daşıdığı mənəvi dəyər xüsusi vurğulanıb.
“Zəfər Salnaməsi” tədbiri gənclərin milli tariximizə marağının artırılması, vətənpərvərlik dəyərlərinin təbliği və Zəfər ruhunun gələcək nəsillərə ötürülməsi baxımından əhəmiyyətli olub.
Ən son xəbərləri səhifəmizdən də izləyin
