https://mail.innews.az/uploads/news/2026-11/_innews_3a3a46f6867d94e6e1c625329_o.jpg
Noyabrın 6-da Azərbaycan Dövlət Uşaq Filarmoniyasında 44 günlük Vətən müharibəsində qazanılmış tarixi Zəfərə həsr olunan konsert proqramı təqdim edilib.
Bu möhtəşəm Zəfər Ali Baş Komandan, Prezident İlham Əliyevin rəhbərliyi, Azərbaycan Ordusunun qəhrəmanlığı, xalqımızın birliyi və Vətən uğrunda canından keçən igidlərimizin fədakarlığı sayəsində tariximizə qızıl hərflərlə yazılıb. 8 Noyabr – Zəfər Günü Azərbaycan xalqının milli qürurunun, sarsılmaz iradəsinin və qəhrəmanlıq salnaməsinin təcəssümüdür.
Konsert proqramından əvvəl Zəfər Gününün tarixi əhəmiyyəti və milli yaddaşımızdakı yeri vurğulanıb, Vətənimizin azadlığı və ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.
Azərbaycan Dövlət Uşaq Filarmoniyası bu əlamətdar günü hər il böyük qürur və təntənə ilə qeyd edərək Vətənə, milli dəyərlərə və qəhrəmanlıq tariximizə həsr olunan tədbirlərlə çıxış edir.
Konserti tanınmış musiqi xadimləri, Pakistan səfirliyinin nümayəndəsi, Uşaq Filarmoniyasının rəhbər heyəti və digər dəvətli qonaqlar izləyiblər.
Konsert proqramında Filarmoniyanın solistləri, uşaq xor kapellası (bədii rəhbər: Naala Barateliya, dirijor: Leyla Muradzadə), “Sədəf” xalq çalğı alətləri Ansamblı (bədii rəhbər Qönçə Mehdiyeva, xanəndəlik müəllimi Elburus Niftəliyev), nağaraçılar ansamblı (bədii rəhbər Mahmud Salah, dirijor Nisə Salah Abbasova), vokal sinfi (müəllim Leyla Aslanova), uşaq folklor mahnı və rəqs ansamblı (bədii rəhbərlər Nigar Zeynalova və Məhəmməd Quliyev, xoreoqraf-müəllim Günel Təhməzova), eləcə də “Səda” uşaq xoru (bədii rəhbər Aysel Mehdizadə) çıxış ediblər. Konsertin baş rejissoru Günay Səttar, quruluşçu rejissor isə Nəsimi Əliyevdir.
Tədbir çərçivəsində Filarmoniyada fəaliyyət göstərən “Art Studio” rəssamlarının təqdimatında Vətənə və qəhrəmanlıq mövzusuna həsr olunmuş əl işlərindən ibarət sərgi də nümayiş olunub.
Konsert proqramı xalqımızın birliyini, həmrəyliyini və milli ruhunu təcəssüm etdirən “Yallı” xalq rəqsi ilə başa çatıb.
Ən son xəbərləri səhifəmizdən də izləyin
