https://mail.innews.az/uploads/news/2026-11/_innews_9a641357059dc7ced294c3719_o.jpg
8 Noyabr – Zəfər Günü münasibətilə Azərbaycan Dövlət Pedaqoji Universitetində (ADPU) Həmkarlar İttifaqı Komitəsinin (HİK) təşkilatçılığı ilə universitetin Qarabağ müharibəsi qazisi və müharibə veteranı olan əməkdaşları, eləcə də şəhid, qazi və müharibə veteranlarının ailə üzvü olan əməkdaşları ilə səmimi görüş keçirilib.
Görüşdə ADPU-nun rektoru professor Cəfər Cəfərov, tədris işləri üzrə prorektor dosent Eldar Aslanov, elm və innovasiyalar üzrə prorektor professor Asəf Zamanov, sosial və humanitar məsələlər üzrə prorektor professor Fikrət Rzayev, ADPU HİK-nın sədri dosent Vaqif Əliyev, fakültə dekanları və struktur bölmələrin rəhbərləri iştirak ediblər.
Əvvəlcə şəhidlərin əbədi xatirələri bir dəqiqəlik sükutla yad edilib.
Çıxış edən rektor prof. Cəfər Cəfərov iştirakçıları Zəfər Günü münasibətilə təbrik edərək bu tarixi qələbənin xalqımız üçün əhəmiyyətindən danışıb. Rektor Azərbaycanın ərazi bütövlüyü uğrunda canından keçən şəhidlərimizin, sağlamlığını itirən qazilərimizin və döyüşlərdə şücaət göstərən müharibə veteranlarımızın xidmətlərini ehtiramla xatırladıb, onların fədakarlığının xalqımızın yaddaşında daim yaşayacağını vurğulayıb.
Professor Cəfər Cəfərov şəhidlərin xatirəsinin yaşadılmasının, qazilərə, müharibə veteranlarına və onların ailələrinə diqqət və qayğı göstərilməsinin mənəvi borcmuz olduğunu vurğulayaraq, bu baxımdan müəllim hazırlayan universitetin üzərinə xüsusi məsuliyyət düşdüyünü bildirib. Rektor gənc nəslin Vətənə bağlılıq, milli-mənəvi dəyərlərə hörmət və vətəndaş məsuliyyəti ruhunda yetişməsində şəhidlərimizin və müharibə iştirakçılarının həyat yolunun mühüm tərbiyəvi əhəmiyyət daşıdığını diqqətə çatdırıb.
ADPU HİK-in sədri dosent Vaqif Əliyev çıxışında Zəfər Gününün doğurduğu qürur hissindən, bu qələbənin arxasında dayanan fədakarlıq və həmrəylikdən bəhs edib. Universitetdə çalışan müharibə iştirakçılarına, şəhid ailələrinin üzvlərinə, qazi və veteranların ailələrini təmsil edən əməkdaşlara xoş arzularını çatdıran komitə sədri onların qayğılarına həssas münasibətin vacibliyini vurğulayıb. Belə görüşlərin birbaşa ünsiyyətə, əməkdaşların fikir və təəssüratlarını bölüşməsinə imkan yaratdığını qeyd edib.
Səmimi söhbət şəraitində davam edən görüşdə iştirakçılar da öz təəssüratlarını bölüşüblər.
Qeyd edək ki, hazırda Pedaqoji Universitetdə 7 nəfər müharibə iştirakçısı, 8 nəfər şəhid ailəsi üzvü, həmçinin qazi və müharibə veteranlarının ailə üzvü olan 8 nəfər əməkdaş fəaliyyət göstərir.
Ən son xəbərləri səhifəmizdən də izləyin
