https://mail.innews.az/uploads/news/2026-11/_innews_94c146d0e78b0aa527f38882e_o.jpg
Azərbaycan Respublikasının Gənclər Fondunun maliyyə dəstəyi, “ASAN Könüllüləri” Təşkilatının və “ASAN Müraciət” İnformasiya Sisteminin tərəfdaşlığı ilə həyata keçirilən “Gənclik 360 Platforması” layihəsinin ikinci görüşü Bərdə rayonunda baş tutub.
Layihə rəhbəri Pərviz Səmədovun rəhbərliyi ilə Bərdə Dövlət Peşə Təhsil Mərkəzində təşkil olunan görüşdə gənclərin aktiv vətəndaşlıq, könüllülük, rəqəmsal təhlükəsizlik, süni intellektdən təhlükəsiz istifadə, inklüzivlik, sosial məsuliyyət, yaşıl gələcək və sağlam həyat tərzi istiqamətlərində məlumatlılığının artırılması məqsədilə panel müzakirəsi keçirilib.
Panel görüşdə “ASAN xidmət”in “ASAN Müraciət” ilə iş sektorunun əməkdaşı Vüsal Həsənov, Qarabağ Regional Gənclər və İdman İdarəsinin Bərdə rayonu üzrə Gənclər və İdman sektorunun müdiri Aydın Qasımov, Bərdə Dövlət Peşə Təhsil Mərkəzinin şöbə müdiri Ramin Əmrahov, Ağcabədi regional “ASAN xidmət” mərkəzinin əməkdaşı və layihə rəhbəri Pərviz Səmədov, eləcə də DOST İnklüziv İnkişaf və Yaradıcılıq Mərkəzinin Qarabağ “DOST Evi” şöbəsinin təlimçisi İbrahim Eyyublu iştirak ediblər.
Sahə mütəxəssisləri müzakirə olunan mövzular üzrə bilik və təcrübələrini iştirakçılarla bölüşüb, gənclərin suallarını cavablandırıblar. Görüş interaktiv müzakirələr və fikir mübadiləsi şəraitində davam edib.
Qeyd edək ki, “Gənclik 360 Platforması” layihəsi gənclərin ictimai iştirakçılığının gücləndirilməsi, rəqəmsal savadlılığının artırılması, sosial və ekoloji məsuliyyət dəyərlərinin təşviqi, eləcə də könüllülük fəaliyyətinə marağının artırılmasına xidmət edir. Layihə çərçivəsində Ağcabədi və Bərdə rayonlarında keçirilən görüşlərə ümumilikdə 200 gənc cəlb olunub.
Layihə Azərbaycan Respublikasının Gənclər Fondunun gənclər təşkilatları və gənclər üçün inkişaf, innovasiya və sosial təşəbbüslər üzrə qrant müsabiqəsi çərçivəsində həyata keçirilir.
Ən son xəbərləri səhifəmizdən də izləyin
