https://mail.innews.az/uploads/news/2026-11/_innews_f9985e82d7dd8cf5d9b7be2ba_o.jpg
Region gənclərinin bilik və bacarıqlarının inkişafına, ictimai iştirakçılığının artırılmasına və aktual mövzular üzrə məlumatlılığının genişləndirilməsinə yönələn “Gənclik 360 Platforması” layihəsi uğurla həyata keçirilib.
Azərbaycan Respublikasının Gənclər Fondunun fərdi qrant müsabiqəsinin qalibi Pərviz Səmədovun təqdim etdiyi “Gənclik 360 Platforması” layihəsi Fondun maliyyə dəstəyi, “ASAN Könüllüləri” Təşkilatının və “ASAN Müraciət” informasiya sisteminin tərəfdaşlığı ilə həyata keçirilib.
Layihə Azərbaycan Respublikasının Gənclər Fondunun gənclər təşkilatları və gənclər üçün inkişaf, innovasiya və sosial təşəbbüslər üzrə qrant müsabiqəsi çərçivəsində həyata keçirilir.
Layihənin əsas məqsədi region gənclərinin aktiv vətəndaşlıq, ictimai iştirakçılıq, rəqəmsal təhlükəsizlik, süni intellekt savadlılığı, inklüzivlik, ekoloji məsuliyyət və könüllülük istiqamətlərində məlumatlılığının artırılması, onların cəmiyyət həyatında daha fəal iştirakına töhfə vermək olub.
Layihə çərçivəsində 5 noyabr 2026-cı il tarixində Ağcabədi rayonunda, Bayraq Muzeyində, 6 noyabr 2026-cı il tarixində isə Bərdə rayonunda, Bərdə Dövlət Peşə Təhsil Mərkəzində görüşlər təşkil olunub. Hər iki görüşdə ümumilikdə 200 gənc iştirak edib.
Görüşlər panel müzakirələri formatında keçirilib. Müxtəlif dövlət qurumlarının, təhsil müəssisələrinin və ictimai təşkilatların nümayəndələri iştirakçılarla öz təcrübələrini bölüşüb, müəyyən edilmiş mövzular üzrə çıxışlar edib və gənclərin suallarını cavablandırıblar.
Müzakirələr zamanı aktiv vətəndaşlıq və ictimai iştirakçılıq, “ASAN Müraciət” informasiya sisteminin imkanları, rəqəmsal təhlükəsizlik və fərdi məlumatların qorunması, süni intellektdən təhlükəsiz və səmərəli istifadə, inklüzivlik, sosial məsuliyyət, sağlam həyat tərzi, ekoloji məsuliyyət və könüllülük məsələləri əhatə olunub. Keçirilən görüşlər çərçivəsində “ASAN Müraciət” sisteminə dair məlumat guşəsi də yaradılıb və iştirakçılar sistemin imkanları ilə daha yaxından tanış olublar.
Layihənin təşəbbüskarı və rəhbəri Pərviz Səmədov bildirib ki, “Gənclik 360 Platforması”nın əsas ideyası gəncləri yalnız məlumatlandırmaq deyil, həm də onları müxtəlif sahələrdən olan mütəxəssislərlə bir araya gətirmək, fikir mübadiləsi aparmaları və yeni əməkdaşlıq əlaqələri qurmaları üçün imkan yaratmaqdır. Onun sözlərinə görə, regionlarda bu cür platformaların yaradılması gənclərin potensialının üzə çıxarılması və ictimai fəallığının təşviqi baxımından mühüm əhəmiyyət daşıyır.
Layihənin yekunlarına həsr olunmuş bağlanış mərasimi 12 noyabr 2026-cı il tarixində Ağcabədi regional “ASAN xidmət” mərkəzində keçirilib. Tədbirdə layihənin icra müddətində həyata keçirilən fəaliyyətləri əks etdirən videoçarx nümayiş olunub, rəsmi qonaqların və təşkilatçıların çıxışları dinlənilib.
Bağlanış mərasiminin xüsusi məqamlarından biri DOST İnklüziv İnkişaf və Yaradıcılıq Mərkəzinin Qarabağ “DOST Evi” şöbəsinin benefisiarları və təlimçisi tərəfindən hazırlanmış əl işləri və rəsm əsərlərindən ibarət sərgi olub. Sərgi iştirakçılara benefisiarların yaradıcılıq bacarıqları və əməyinin nəticələri ilə tanış olmaq imkanı yaradıb. Tədbirin sonunda layihənin həyata keçirilməsində fəallığı ilə seçilən gənclər və layihəyə dəstək göstərən tərəfdaşlar təşəkkürnamələrlə təltif olunublar.
Qeyd edək ki, layihə çərçivəsində Ağcabədi və Bərdə rayonlarından ümumilikdə 200 gənc əhatə olunub. “Gənclik 360 Platforması” müxtəlif sahələr üzrə maarifləndirmə, təcrübə mübadiləsi və əməkdaşlıq imkanlarını bir araya gətirən regional gənclər təşəbbüsü kimi həyata keçirilib.
Ən son xəbərləri səhifəmizdən də izləyin