https://mail.innews.az/uploads/news/2026-10/_innews_02cd4f143b6caa6e60109601c_o.jpg
Azərbaycan Dillər Universitetinin Türk Dünyası Araşdırmaları Mərkəzinin təşkilatçılığı ilə “Türk Dünyasında Milli Müdafiə sistemləri” mövzusunda tədbir keçirilib.
1 oktyabr 2026-cı il tarixində Azərbaycan Dillər Universitetinin Heydər Əliyev lektoriyasında keçirilən tədbirdə türk dövlətləri arasında birliyin əhəmiyyəti, milli müdafiə sistemlərinin dövlətlərin təhlükəsizliyi və müstəqilliyinin qorunmasındakı rolu, Azərbaycan və Türkiyədə müdafiə sənayesinin inkişafı və bu sahəyə göstərilən dövlət diqqəti barədə tələbələrə məlumat verilib.
Tədbiri Türk Dünyası Araşdırmaları Mərkəzinin müdiri Cəlal İbrahimli açaraq iştirakçıları salamlayıb və tədbirə qatılan qonaqlara təşəkkürünü bildirib. Çıxışında türk dünyasının birliyinin əhəmiyyətinə toxunan Cəlal İbrahimli qeyd edib ki, ortaq tarix, dil və mədəni dəyərlərlə yanaşı, müasir dövrdə təhlükəsizlik və milli müdafiə məsələləri də türk dövlətlərinin diqqət yetirməli olduğu mühüm istiqamətlərdəndir. O, türk dövlətləri arasında birlik və həmrəyliyin gücləndirilməsinin dövlətlərin milli maraqlarının və təhlükəsizliyinin qorunmasına mühüm töhfə verə biləcəyini vurğulayıb.
Cəlal İbrahimli çıxışında Azərbaycan və Türkiyənin milli müdafiə sənayesinin inkişafına da xüsusi diqqət çəkib. O bildirib ki, müdafiə sənayesinin gücləndirilməsi dövlətin təhlükəsizliyinin təmin olunması ilə yanaşı, onun texnoloji və iqtisadi imkanlarının inkişafı baxımından da mühüm əhəmiyyət daşıyır. Bu istiqamətdə Azərbaycan və Türkiyədə son illərdə həyata keçirilən işlərə toxunan Cəlal İbrahimli hər iki ölkənin dövlət rəhbərliyinin milli müdafiə sənayesinin inkişafına göstərdiyi diqqəti xüsusi qeyd edib.
O, Türkiyə Prezidenti Rəcəb Tayyib Ərdoğanın rəhbərliyi dövründə yerli və milli müdafiə sənayesinin inkişafına verilən önəmdən, Türkiyənin öz müdafiə imkanlarını və texnoloji potensialını gücləndirmək istiqamətində həyata keçirdiyi siyasətdən bəhs edib. Türkiyənin müdafiə sənayesində əldə etdiyi nailiyyətlərin yalnız ölkənin milli təhlükəsizliyi baxımından deyil, dost və qardaş dövlətlərlə əməkdaşlıq imkanlarının genişlənməsi baxımından da əhəmiyyətli olduğunu bildirib. Türkiyənin müdafiə sənayesində son illərdə əldə etdiyi inkişafın Azərbaycan-Türkiyə hərbi və hərbi-texniki əməkdaşlığına da müsbət təsir göstərdiyi diqqətə çatdırılıb.
Cəlal İbrahimli, həmçinin Azərbaycan Prezidenti İlham Əliyevin milli müdafiə sənayesinin inkişafına göstərdiyi diqqətdən danışıb. Azərbaycanın öz müdafiə imkanlarını gücləndirməsi, yerli istehsalın və yeni texnologiyaların inkişaf etdirilməsi istiqamətində həyata keçirilən tədbirlərin ölkənin milli təhlükəsizliyi baxımından əhəmiyyətini vurğulayıb. O qeyd edib ki, Azərbaycan və Türkiyə arasında müdafiə sənayesi sahəsində əməkdaşlığın inkişafı iki qardaş ölkənin strateji münasibətlərinin mühüm istiqamətlərindən biridir. Bu əməkdaşlığın son dövrdə yeni layihə və təşəbbüslərlə genişlənməsi də bu sahəyə verilən diqqətin göstəricisidir.
Daha sonra Yunus Emre İnstitutunun koordinatoru Gökhan Seyhan çıxış edib. O, türk dünyası dövlətləri arasında əlaqələrin möhkəmləndirilməsinin və ortaq dəyərlərin qorunmasının əhəmiyyətindən danışıb. Türk dövlətlərini birləşdirən ortaq tarixi və mədəni bağların müxtəlif sahələrdə əməkdaşlığın inkişafı üçün mühüm əsas yaratdığını qeyd edib.
Üstünova Mühendislik ve Araştırma Geliştirme A.Ş.-nin baş direktoru Tolga Üstünova çıxışında milli müdafiə sistemlərinin inkişafında mühəndislik və texnologiyanın rolundan bəhs edib. O, müdafiə sənayesində araşdırma və inkişaf fəaliyyətlərinin, yeni texnologiyaların hazırlanmasının və yüksək ixtisaslı mütəxəssislərin yetişdirilməsinin əhəmiyyətinə diqqət çəkib.
Bursa Texniki Universitetinin müəllimi Doç. Dr. Ali Burak Darıcılı isə çıxışında müasir təhlükəsizlik anlayışı və milli müdafiə sistemlərinin qarşısında duran yeni çağırışlardan danışıb. O, müasir dövrdə milli təhlükəsizliyin yalnız ənənəvi müdafiə imkanları ilə məhdudlaşmadığını, kəşfiyyat, kibertəhlükəsizlik və texnoloji imkanların da bu sahənin mühüm tərkib hissələrinə çevrildiyini diqqətə çatdırıb.
Tədbirdə, həmçinin Bursa Uludağ Universitetinin professoru Prof. Dr. Kərimə Üstünova iştirak edib.
Tədbir çərçivəsində qonaqlar Azərbaycan Dillər Universitetinin Elm və innovasiya məsələləri üzrə prorektoru professor Həmidə Əliyeva ilə görüşüblər. Görüş zamanı qarşılıqlı əməkdaşlıq imkanları və gələcək birgə təşəbbüslər barədə fikir mübadiləsi aparılıb.
Tədbir zamanı tələbələrə Azərbaycan və Türkiyənin milli müdafiə sənayesinin inkişaf istiqamətləri, milli müdafiə sistemlərinin əhəmiyyəti və müasir təhlükəsizlik çağırışları barədə məlumat verilib. Çıxışlarda xüsusilə türk dövlətləri arasında birlik və həmrəyliyin gücləndirilməsinin, milli imkanların inkişaf etdirilməsinin və təhlükəsizlik məsələlərinə xüsusi diqqət yetirilməsinin vacibliyi vurğulanıb.
Sonda iştirakçıların mövzu ilə bağlı sualları cavablandırılıb və tədbir qarşılıqlı fikir mübadiləsi şəraitində başa çatıb.
Ən son xəbərləri səhifəmizdən də izləyin
