https://mail.innews.az/uploads/news/2026-10/_innews_5d7e39c2dda6ad7c468df0755_o.jpg
Azərbaycan Dövlət Aqrar Universitetində (ADAU) 5 Oktyabr – Beynəlxalq Müəllimlər Gününə həsr olunan tədbir keçirilib.
Tədbirdə əvvəlcə torpaqlarımızın azadlığı uğrunda canlarından keçən şəhidlərin əziz xatirəsi bir dəqiqəlik sükutla yad edilib sonra Dövlət Himni səsləndirilib.
ADAU-nun rektoru Zəfər Qurbanov tədbirdə universitetin professor-müəllim heyətini bayram münasibətilə təbrik edib. Rektor rəqəmsallaşmanın sürətlə inkişaf etdiyi müasir dövrdə müəllim əməyinin və müəllim şəxsiyyətinin əhəmiyyətini qoruduğunu diqqətə çatdırıb. Qeyd edib ki, insanın tərbiyəsinin təməli ailədə qoyulsa da, onun dünyagörüşünün formalaşmasında, düzgün peşə seçməsində və gələcək həyat yolunun müəyyənləşməsində müəllimin rolu əvəzsizdir.
Azərbaycanda müəllim peşəsinə xüsusi ehtiram göstərildiyini vurğulayan Zəfər Qurbanov müəllim üçün əsl bayramın yetişdirdiyi tələbələrin uğurlarını görmək olduğunu qeyd edərək professor-müəllim heyətinə fəaliyyətlərində uğurlar arzulayıb.
Çıxışının sonunda Zəfər Qurbanov ADAU-nun Kimya kafedrasının professoru Elman Mövsümovu 85 illik yubileyi münasibətilə təbrik edib. Professorun uzunillik fəaliyyətinə verilən dəyərin göstəricisi olaraq ona plaket və hədiyyə təqdim edib.
Elman Mövsümov göstərilən diqqətə görə universitet rəhbərliyinə təşəkkürünü bildirib.
Tədbir çərçivəsində Beynəlxalq Müəllimlər Gününə həsr edilmiş videoçarx nümayiş olunub.
Daha sonra ADAU-nun Kimya kafedrasının müdiri Ülviyyə Həsənova professor Elman Mövsümovun elmi-pedaqoji fəaliyyətindən, kimya elminin və tədrisinin inkişafına verdiyi töhfələrdən, tələbə və gənc alimlərin hazırlanmasındakı xidmətlərindən bəhs edib.
Ardınca professor Elman Mövsümovun həyat və yaradıcılığına həsr edilən videoçarx izlənilib.
Tədbirdə iştirak edən, professor Elman Mövsümovun elmi rəhbəri olmuş görkəmli alim Xudu Məmmədovun oğlu Toğrul Məmmədov müəllim peşəsinin insan həyatındakı xüsusi əhəmiyyətindən danışıb, professor-müəllim heyətinə xoş arzularını çatdırıb və Elman Mövsümovla bağlı xatirələrini bölüşüb.
Tədbirin sonunda ADAU tələbələrinin hazırladığı bədii proqram nümayiş etdirilib. Tələbələr tərəfindən Beynəlxalq Müəllimlər Gününə həsr olunan şeir və musiqi nömrələri səsləndirilib.
Ən son xəbərləri səhifəmizdən də izləyin
