https://mail.innews.az/uploads/news/2026-10/_innews_0d57a503e32a9fe643cfd1ab5_o.jpg
Azərbaycan Dövlət Pedaqoji Universitetində (ADPU) 5 Oktyabr – Beynəlxalq Müəllimlər Günü münasibətilə tədbir keçirilib. Tədbirdə ADPU-nun professor-müəllim heyəti, əməkdaşları, tələbələri, məzunları və qonaqlar iştirak ediblər.
Tədbir Ümummilli Lider Heydər Əliyevin və Azərbaycan Respublikasının müstəqilliyi, suverenliyi və ərazi bütövlüyü uğrunda şəhid olmuş həmvətənlərimizin xatirəsinin bir dəqiqəlik sükutla yad edilməsi ilə başlayıb. Ardınca Azərbaycan Respublikasının Dövlət Himni səsləndirilib.
Tədbirin açılışında ADPU-nun Xor kollektivinin ifasında universitetin müəllimi olmuş görkəmli bəstəkar Nailə Mirməmmədlinin “Müəllim” əsəri təqdim olunub.
Tədbiri giriş sözü ilə açan ADPU-nun rektoru professor Cəfər Cəfərov professor-müəllim heyətini, tələbələri və tədbir iştirakçılarını Beynəlxalq Müəllimlər Günü münasibətilə təbrik edib, müəllimliyin yalnız bilik ötürmək deyil, insanın düşüncəsinə, dünyagörüşünə və gələcəyə baxışına təsir edən, cəmiyyətin inkişafına töhfə verən məsuliyyətli peşə olduğunu diqqətə çatdırıb.
Müasir dövrdə rəqəmsallaşma, süni intellekt və yeni öyrənmə modellərinin müəllim qarşısında yeni tələblər yaratdığını qeyd edən rektor müasir müəllimin daim öyrənməli, yenilənməli və şagird-tələbələrə araşdırma, düşünmə və müstəqil qərarvermə bacarıqları qazandırmalı olduğunu vurğulayıb.
Prof. Cəfər Cəfərov ADPU-nun 105 illik tarixindən və müəllim hazırlığında mühüm rolundan danışaraq bildirib ki, ölkə üzrə pedaqoji ixtisaslara ayrılan hər 100 plan yerindən təxminən 36-sı ADPU və onun filiallarının payına düşür. 2026-2027-ci tədris ilində universitet və filialları üzrə 3605 plan yerinin 3491-i ilk mərhələdə dolub və qəbul planının icrası 96,84 faiz təşkil edib.
Rektor, həmçinin, yüksək nəticə göstərən gənclərin müəllimlik peşəsinə marağının artdığını qeyd edib. Bu il ADPU şəbəkəsində dövlət sifarişi üzrə keçid balı 500 və daha yüksək olan 14 ixtisas formalaşıb.
Rektor məktəblərlə əməkdaşlığın genişləndirilməsi, mentor institutunun yaradılması, pedaqoji təcrübənin gücləndirilməsi və elmi tədqiqatların məktəbin real ehtiyaclarına yaxınlaşdırılmasının prioritet istiqamətlər olduğunu vurğulayıb.
Müəllimə verilən ən böyük qiymətin onun yetişdirdiyi insanın uğuru olduğunu qeyd edən prof. C.Cəfərov ADPU-nun əsas məqsədinin müasir dövrün çağırışlarına cavab verən, cəmiyyət üçün dəyər yaradan müəllimlər yetişdirmək olduğunu vurğulayıb.
Tədbirdə çıxış edən Elm və Təhsil İşçiləri Həmkarlar İttifaqı Respublika Komitəsinin sədri, ADPU-nun Tarix fakültəsinin 2004-cü il məzunu Araz Paşayev müəllimlik peşəsinin cəmiyyətin inkişafındakı mühüm rolundan danışıb, müəllimlərin gələcək nəslin formalaşmasında böyük məsuliyyət daşıdığını vurğulayıb. O bildirib ki, müəllim yalnız bilik verən deyil, eyni zamanda gənclərin dünyagörüşünün, vətəndaşlıq mövqeyinin və həyata baxışının formalaşmasına təsir göstərən şəxsdir.
Müəllim əməyinin nəticəsinin illər sonra özünü göstərdiyini qeyd edən Araz Paşayev bu peşənin böyük məsuliyyət və fədakarlıq tələb etdiyini vurğulayıb.
ADPU-nun məzunu kimi universitetlə bağlı xatirələrini bölüşərək tələbəlik illərinin onun həyatında mühüm iz buraxdığını bildirib. O, doğma universitetdə, müəllim yetişdirən bu ali təhsil ocağında Beynəlxalq Müəllimlər Günü münasibətilə keçirilən tədbirdə iştirakından məmnunluğunu ifadə edib.
ADPU-nun beynəlxalq əlaqələr üzrə prorektoru və universitetin Filologiya fakültəsinin 1984-cü il məzunu professor Mahirə Hüseynova çıxışında müəllimlik peşəsinin böyük məsuliyyət və mənəvi missiya olduğunu vurğulayıb. O qeyd edib ki, müəllimin yetişdirdiyi hər bir şagird və tələbə onun əməyinin, biliyinin və insani dəyərlərinin daşıyıcısına çevrilir. Bu baxımdan müəllimin daim öz üzərində işləməsi, yenilikləri izləməsi və gənclərə yalnız bilik deyil, düzgün istiqamət verməsi xüsusi əhəmiyyət daşıyır. M.Hüseyova ADPU-da tələbəlik illərini xatırlayaraq universitetdə qazandığı bilik və dəyərlərin sonrakı elmi və peşəkar fəaliyyətində mühüm rol oynadığını bildirib. Prorektor tələbələrə daim öyrənməyi, öz üzərlərində işləməyi və müasir çağırışlara uyğun inkişaf etməyi tövsiyə edib, professor-müəllim heyətini bayram münasibətilə təbrik edib.
Tədbirin bədii proqramı müxtəlif musiqi nömrələri ilə davam edib. 2025-ci il məzunu Arif Səmədzadə Tofiq Quliyevin “Tez gəl” mahnısını, İncəsənət və fiziki tərbiyə fakültəsinin I kurs tələbəsi Əsmər Eyvazova Ceyhun Allahverdiyevin “Sevəcəm” əsərini, ADPU-nun 2022-ci il məzunu Məxfirət Əlişanova isə Emin Sabitoğlunun “Bağışla” mahnısını ifa edib.
Tədbirin xüsusi məqamlarından biri də uzun illərdir ADPU-da fəaliyyət göstərən məzunlarla görüş olub. Müxtəlif illərdə universitetin ayrı-ayrı fakültələrindən məzun olmuş əməkdaşlar səhnəyə dəvət edilib, tələbəlik illəri, müəllimləri və doğma universitetlə bağlı xatirələrini tədbir iştirakçıları ilə bölüşüblər.
Ən son xəbərləri səhifəmizdən də izləyin
