https://mail.innews.az/uploads/news/2026-10/_innews_18fd7b8e7bee0c3aadbfe9ea7_o.jpg
Mərkəzi Bankın sədr müavini Vüsal Xəlilov Türk Dövlətləri Fintex Alyansının (TURKFIN) təşkilatçılığı ilə keçirilən "Bakı Fintex Sektoru Ticarət Heyəti Proqramı" tədbirində açılış nitqi ilə çıxış edib.
Sədr müavini çıxışı zamanı Azərbaycanda maliyyə texnologiyalarının inkişafı, rəqəmsal maliyyə xidmətlərinin genişləndirilməsi, eləcə də innovativ həllərin tətbiqi və bu sahədə beynəlxalq əməkdaşlığın əhəmiyyətinə toxunub. O, bazar şəraiti və ödəniş bazarı iştirakçılarının rəyləri nəzərə alınmaqla hazırda “Ödəniş xidmətləri və ödəniş sistemləri haqqında” Azərbaycan Respublikasının Qanununun təkmilləşdirilməsi istiqamətində işlərin davam etdirildiyini və qanunvericiliyə ediləcək dəyişikliklərin fintexlərə daha geniş fəaliyyət çərçivəsi yaradacağını tədbir iştirakçılarının diqqətinə çatdırıb. Vüsal Xəlilov eyni zamanda, açıq bankçılıq konsepsiyasının fintexlər üçün yeni imkanlar formalaşdırmaqla məhsul və xidmətlərin tətbiqi trayektoriyasının genişləndirilməsinə töhfə verəcəyinə dair inamını ifadə edib.
Qeyd edək ki, tədbirdə Türkiyə, Azərbaycan, Qazaxıstan, Qırğızıstan və Özbəkistan fintex şirkətlərinin, rəqəmsal ödəniş platformalarının, elektron pul təşkilatlarının, kommersiya banklarının, vençur kapital fondlarının və texnologiya şirkətlərinin təsisçiləri və rəhbər şəxsləri, habelə maliyyə sektorunun tənzimləyici qurumlarının və assosiasiyalarının nümayəndələri iştirak ediblər. Tədbir çərçivəsində rəqəmsal ödənişlərin gələcəyi, ortaq tənzimləmə yanaşmaları və yeni nəsil ödəniş trendləri müzakirə olunub.
Ən son xəbərləri səhifəmizdən də izləyin
