https://mail.innews.az/uploads/news/2026-10/_innews_0a6812e439ecc395371f63762_o.jpg
Azərbaycan Dövlət Pedaqoji Universitetinin (ADPU) Riyaziyyat fakültəsində I kurs tələbələri üçün “Süni intellekt dövrünün tələbəsi necə olmalıdır?” mövzusunda seminar təşkil olunub. Tədbirdə ADPU-nun tədris işləri üzrə prorektoru dosent Eldar Aslanov, Riyaziyyat fakültəsinin dekanı dosent Allahverdi Cəfərov, kafedra müdirləri, müəllimlər və tələbələr iştirak ediblər.
ADPU-nun tədris işləri üzrə prorektoru dosent Eldar Aslanov çıxışında mövzunun aktuallığını vurğulayaraq, süni intellektin təhsil prosesində düzgün və məqsədyönlü istifadəsinin vacibliyini qeyd edib. Prorektor tələbələrin yeni texnologiyalardan faydalanmaqla yanaşı, müstəqil düşünmə, təhlil və qərarvermə bacarıqlarını da inkişaf etdirmələrinin əhəmiyyətini diqqətə çatdırıb.E.Aslonov bu istiqamətdə seminarların digər fakültələrdə və universitetin filiallarında da təşkilinin faydalı olacağını bildirib.
Seminarda ADPU-nun Kompüter elmləri kafedrasının dosenti İlham Əhmədov mövzu ilə bağlı məruzə ilə çıxış edib. Məruzədə süni intellektdən səmərəli və məsuliyyətli istifadə, tələbələrin müstəqil düşünmə, yaradıcılıq və analitik təhlil bacarıqlarının inkişafı məsələlərinə toxunulub. Qeyd olunub ki, süni intellekt dövründə tələbənin uğuru yalnız məlumat əldə etmək və yadda saxlamaqla deyil, düzgün sual vermək, informasiyanı yoxlamaq, problemləri müəyyənləşdirmək və müstəqil fikir formalaşdırmaq bacarığı ilə ölçülür. Süni intellektin tələbənin əvəzinə düşünən deyil, onun daha yaxşı düşünməsinə kömək edən vasitə kimi istifadəsinin vacibliyi vurğulanıb.
Tədbir mövzu ətrafında müzakirələrlə davam edib, tələbələri maraqlandıran suallar cavablandırılıb. Müzakirələr zamanı süni intellektdən istifadənin yaratdığı imkanlar, informasiya ilə müstəqil işləmək və akademik məsuliyyətin qorunması məsələləri diqqət mərkəzində olub.
Ən son xəbərləri səhifəmizdən də izləyin
