https://mail.innews.az/uploads/news/2026-10/_innews_67d2fcb4ccf09041e38702095_o.jpg
Hot Wheels Team Azerbaijan icmasının təşkilatçılığı ilə 25 oktyabr 2026-cı il tarixində Bakıda “Red Line Diecast Meet 2026” adlı diecast kolleksiya sərgisi keçirilib.
Avery Dennison avto servisinin məkan dəstəyi ilə təşkil olunan tədbir müxtəlif diecast kolleksiyaçılarını, avtomobil modellərinə maraq göstərən şəxsləri və bu sahədə fəaliyyət göstərən icmaları bir araya gətirib.
Sərginin əsas məqsədi diecast kolleksiyaçılığı mədəniyyətinin təşviqi, kolleksiyaçılar arasında ünsiyyət və əməkdaşlığın gücləndirilməsi, eləcə də Azərbaycanda bu sahənin daha geniş auditoriyaya tanıdılması olub.
Tədbir çərçivəsində iştirakçılar öz kolleksiyalarını nümayiş etdirmək, müxtəlif miqyaslı avtomobil modelləri ilə tanış olmaq və digər kolleksiyaçılarla təcrübə mübadiləsi aparmaq imkanı əldə ediblər. Müxtəlif diecast icmalarının iştirakı tədbirin əhatə dairəsini genişləndirib və kolleksiyaçılıq sahəsində birlik və əməkdaşlığın əhəmiyyətini bir daha nümayiş etdirib.
Sərgi proqramı çərçivəsində iştirakçılar üçün hədiyyə çəkilişi təşkil olunub. Kolleksiya modelləri və xüsusi avtomobil nümunəsi isə tədbirə əlavə maraq qatıb.
Hot Wheels Team Azerbaijan Azərbaycanda diecast kolleksiyaçılığı mədəniyyətinin inkişaf etdirilməsini, kolleksiyaçıların bir araya gətirilməsini və bu sahədə yeni layihələrin həyata keçirilməsini əsas fəaliyyət istiqamətlərindən biri hesab edir. İcma gələcəkdə daha genişmiqyaslı tədbirlər təşkil etməyi, beynəlxalq diecast sərgilərində Azərbaycanı təmsil etməyi və ölkəmizdə beynəlxalq səviyyəli sərgilərin keçirilməsinə nail olmağı hədəfləyir.
Bu məqsədlərin reallaşdırılması üçün müvafiq dövlət və özəl qurumların, potensial sponsorların və tərəfdaşların dəstəyinə ümid edilir. Göstəriləcək dəstəyin yerli kolleksiyaçılıq icmasının inkişafına, beynəlxalq əməkdaşlıq əlaqələrinin genişlənməsinə və Azərbaycanın beynəlxalq diecast platformalarında tanıdılmasına töhfə verəcəyi gözlənilir.
“Red Line Diecast Meet 2026” sərgisi Azərbaycanda diecast kolleksiyaçılığı sahəsində icmaların bir araya gəlməsi, təcrübə mübadiləsinin təşviqi və gələcək əməkdaşlıqlar üçün imkanların yaradılması baxımından əhəmiyyətli təşəbbüslərdən biri olub.
Hot Wheels Team Azerbaijan tədbirin təşkilində göstərdikləri dəstəyə görə Avery Dennison rəhbərliyinə, iştirak edən kolleksiyaçılara, tərəfdaşlara, digər diecast icmalarına və bütün qonaqlara təşəkkürünü bildirir.
İcma gələcək fəaliyyətində Azərbaycanda diecast kolleksiyaçılığı mədəniyyətinin inkişafına, beynəlxalq sərgilərdə ölkəmizin təmsil olunmasına və beynəlxalq səviyyəli tədbirlərin Azərbaycanda təşkilinə töhfə verməyi qarşısına məqsəd qoyur.
Ən son xəbərləri səhifəmizdən də izləyin
