https://mail.innews.az/uploads/news/2026-11/_innews_938d8236bc0624865b099d3cf_o.jpg
Noyabrın 1-də Bakıda virtual futbol həvəskarlarının diqqəti Red Bull Wings Cup Azərbaycan Milli Finalına yönələcək. Təsnifat mərhələlərini uğurla keçən 16 EA SPORTS FC™ 27 oyunçusu Azərbaycan çempionu olmaq və Mayamidə keçiriləcək Dünya Finalına vəsiqə qazanmaq üçün mübarizə aparacaq.
Red Bull brendinin EA SPORTS FC™ 27 və PlayStation® ilə rəsmi tərəfdaşlığı çərçivəsində təşkil olunan turnirdə seçimlər iki liqa üzrə aparılıb. University League tələbələri bir araya gətirib, Open League isə digər oyunçulara da güclərini sınamaq imkanı yaradıb. Hər iki liqanın təmsilçiləri indi Milli Finalda qarşılaşacaqlar. Onlardan yalnız biri Azərbaycanı Dünya Finalında təmsil etmək hüququ qazanacaq.
Universitet Liqasından səkkiz oyunçu finala yüksəlib.
University League iştirakçıları EA SPORTS FC™ 27 oyununun Rush rejimində yarışaraq Milli Finala vəsiqə uğrunda mübarizə aparıblar. Universitetlərdə və oyun mərkəzində keçirilən seçimlərin nəticəsində səkkiz tələbə finalçılar sırasına qoşulub.
Odlar Yurdu Universitetini: Nail Mehdiyev və Zəfər Şirzadov, Azərbaycan Dövlət İqtisad Universitetini (UNEC) Əli Vəliyev və Yusif Vəliyev, Azərbaycan Texniki Universitetini (AzTU) isə Elcan Məmmədzadə və Bəyəli Səfərov təmsil edəcəklər.
Just For Fun oyun mərkəzində keçirilən Universitet Liqası seçimlərindən isə Əli Məmmədov və Heydər Əhmədov Milli Finala vəsiqə qazanıblar.
Açıq Liqanın oyunçuları da çempionluğa iddialıdır.
Open League çərçivəsində müxtəlif oyun mərkəzlərində və Game Summit tədbirində keçirilən təsnifat mərhələlərindən daha səkkiz oyunçu Milli Finala yüksəlib.
KENZA oyun mərkəzindən Akif Rəhmanov və Orxan Cəfərzadə, Game Summit çərçivəsində keçirilən seçimlərdən isə Əlizadə Hüseyn və Tural Əmirhüseynov finalda iştirak hüququ qazanıblar.
OMG oyun mərkəzindən Tural Həsənov və Elnar Ağarzayev, Just For Fun seçimlərindən isə Rəvan Cəmiyev və Fərid Əliyev finalçılar sırasına qoşulublar.
Azərbaycan çempionu noyabrın 1-də bəlli olacaq.
Milli Final noyabrın 1-də Bakıda, Baku Events Hall (Nizami Cinema) məkanında keçiriləcək. Qarşılaşmalar saat 15.00-da başlayacaq.
Təsnifat mərhələlərini geridə qoyan oyunçuları indi çempionluq uğrunda həlledici görüşlər gözləyir. Hər qələbə Mayamiyə bir addım da yaxınlaşdırdığı üçün dəqiq ötürmə, vaxtında vurulan qol və son dəqiqələrdə qorunan soyuqqanlılıq yarışın taleyini həll edə bilər.
Milli Finalın qalibi Azərbaycan çempionu adını qazanmaqla yanaşı, 2027-ci ilin əvvəlində Mayamidə keçiriləcək Red Bull Wings Cup Dünya Finalına yollanacaq. Səfərinin bütün xərcləri qarşılanacaq Azərbaycan təmsilçisi orada dünyanın 80-ə yaxın ölkəsindən gələn oyunçularla yarışacaq.
Mayamidə oyunçuları fərqli sınaqlar gözləyir.
Inter Miami futbol klubunun Nu Stadium stadionunda keçiriləcək Dünya Finalı virtual futbolu real futbol sınaqları ilə birləşdirəcək. İştirakçılar oyun bacarıqları ilə yanaşı, fərqli şəraitə uyğunlaşmaq məharətlərini də nümayiş etdirməli olacaqlar.
Dünya Finalının ən güclü 16 iştirakçısı mübarizəni qeyri-adi şəraitdə davam etdirəcək. Stadionun nəhəng ekranında baş tutacaq oyunlarla yanaşı, yarış avtomobilində, sürətli qayıqda və hətta helikopterdə də qarşılaşmalar keçiriləcək. Oyunçular dəyişən şəraitdə diqqətlərini qorumağa və rəqiblərinin gedişlərinə çevik cavab verməyə çalışacaqlar.
Mayamiyə gedən yol Bakıdan keçir. Noyabrın 1-də Baku Events Hall məkanında keçiriləcək Milli Finalda həm Azərbaycan çempionu müəyyənləşəcək, həm də ölkəmizi bu beynəlxalq yarışda təmsil edəcək oyunçunun adı bəlli olacaq.
Red Bull Wings Cup EA SPORTS FC™ 27 və PlayStation® Tournaments ilə rəsmi tərəfdaşlıq çərçivəsində keçirilir.
Ən son xəbərləri səhifəmizdən də izləyin
