https://mail.innews.az/uploads/news/2026-11/_innews_50df946871d05467477528519_o.jpg
Oktyabrın 30-da Azərbaycan Milli Xalça Muzeyində Vətən müharibəsində qazanılmış Zəfərin altıncı ildönümünə həsr olunmuş “Çapanda ağ-boz atın büdrəməsin” adlı sərgi açılıb. Azərbaycan Respublikası Mədəniyyət Nazirliyi, Azərbaycan Milli Xalça Muzeyi və Azərbaycan Dövlət Mədəniyyət və İncəsənət Universitetinin birgə təşkilatçılığı ilə keçirilir.
Açılış mərasimində Azərbaycan Respublikası mədəniyyət nazirinin müavini Səadət Yusifova, Milli Məclisin Mədəniyyət komitəsinin sədri Polad Bülbüloğlu, Azərbaycan Dövlət Mədəniyyət və İncəsənət Universitetinin beynəlxalq əlaqələr üzrə prorektoru Sevil Kərimova, Qazi Universitetinin professoru Alev Çakmakoğlu, “Thereplika” yayım şirkətinin həmtəsisçisi Ahmet Taner Özər və sərginin həmkuratoru, tarix üzrə fəlsəfə doktoru Səbuhi Əhmədov çıxış edərək layihənin əhəmiyyətindən, döyüş atı obrazının tarixi və mədəni irsimizdəki yerindən bəhs ediblər. Tədbirdə rəssam Naqiya Rzayevanın qum sənəti (sand-art) üslubunda hazırladığı “Laçın – döyüş atı” adlı kompozisiyası da nümayiş olunub.
Ekspozisiyada yerli və türkiyəli müasir rəssam və heykəltəraşların 50-dən çox əsəri – rəngkarlıq, heykəltəraşlıq, qrafika və dekorativ-tətbiqi sənət nümunələri sərgilənir. Qobustan və Gəmiqaya qayaüstü təsvirlərindən, daş salnamələrimizdən, miniatür sənətindən və monumental rəngkarlıq ənənələrindən ilhamlanaraq yaradılan əsərlərdə Azərbaycan tarixinin şanlı səhifələri və görkəmli şəxsiyyətləri də əksini tapıb.
Layihənin əsas məqsədi Azərbaycan xalqının tarixi yaddaşında və mədəni irsində xüsusi yer tutan döyüş atı obrazını yeni bədii interpretasiyalarda təqdim etməkdir. Sərgidə at yalnız döyüş vasitəsi deyil, həm də insanın sirdaşı, yol bələdçisi və xilaskarı, əcdad yaddaşının daşıyıcısı kimi təcəssüm olunur.
Sərgi çərçivəsində kolleksionerlər Yusif Bağırzadə və İlqar Həsənəlizadənin şəxsi kolleksiyalarından XVII–XXI əsrlərə aid tarixi silah nümunələri və onların replikaları təqdim edilir. Eksponatlar arasında şahzadə Abbas Mirzə Qacarın, II Şah Abbasın, Səfəvi dövlətinin vilayətlərindən birinin hakiminin və Şəki xanlarının istifadə etdikləri silahlar, eləcə də Sultan Uzun Həsən və Şah İsmayıl Xətaiyə aid silahların, həmçinin zülfüqar qılıncı və şaşkanın ənənəvi üsullarla hazırlanmış replikaları yer alır. Döyüş atı mövzusunda süjetlərlə bəzədilmiş ənənəvi formalı sandıq da sərginin diqqətçəkən eksponatlarından biridir.
Sərginin nəfis tərtibatlı kataloqu Türkiyənin partnyor “Thereplika” nəşriyyatı tərəfindən hazırlanıb.
Qeyd edək ki, bu istiqamətdə ilk sərgi 2025-ci ildə döyüş silahları mövzusuna həsr olunub və uğurla keçirilib.
Sərgi noyabrın 15-dək davam edəcək.
Ən son xəbərləri səhifəmizdən də izləyin
