"Şamaxı" ilə "Turan Tovuz"a 2500 manatlıq cərimə

Azərbaycan Premyer Liqasının 10-cu turunda “Şamaxı” və “Turan Tovuz” meydana kənar şəxslər daxil olduğuna görə 2500 manat cərimələnib.

Bu barədə AFFA İntizam Komitəsinin iclasında qərar qəbul olunub.

Noyabrın 1-də keçirilən “Şamaxı” – “Neftçi” matçının fasiləsində meydana kənar şəxslər daxil olduğuna görə şamaxılılar 2500 manat cərimələnib. Həmçinin “Neftçi”nin fotoqrafı əsasnamənin tələblərini pozduğu üçün klub 500 manat cərimə olunub.

Noyabrın 2-də “Sumqayıt” – “Şəfa” matçında 5 futbolçusu sarı vərəqə alan qonaq komanda 700 manat cəriməyə məruz qalıb.

Oktyabrın 30-da baş tutan “Turan Tovuz” – “Sabah” matçı bitdikdən sonra meydana kənar şəxs daxil olduğu üçün Tovuz təmsilçisi 2500 manat cərimə olunub. Həmin oyunda 5 futbolçusu sarı vərəqə alan “Sabah” isə 700 manat cərimələnib.