"Neftçi"dən əsrin rekordu

Azərbaycan Premyer Liqasının lideri “Neftçi” keçirdiyi 10 qarşılaşmada 25 qol vurmaqla özü üçün 21-ci əsrin rekorduna imza atıb.

Bu barədə Peşəkar Futbol Liqası məlumat verib.

Bakı klubunun mövsümün ilk 10 çempionat matçında ən azı 25 qol vurması sonuncu dəfə 2000-ci ildə qeydə alınıb. Paytaxt təmsilçisi 2000/2001 mövsümünün müvafiq dövründə 28 qol vurub.

Son 25 mövsümün ən yaxşı göstəricisinə imza atan “Neftçi” bundan əvvəlki 24 turnirin ilk 10 matçında da orta məhsuldarlıqda 2,50-yə çata bilməyib.

1992-ci ildən keçirilən çempionatın tarixində ən yaxşı nəticə də “Neftçi”yə məxsusdur. Bakı təmsilçisi 1996/1997 mövsümünün startında 10 oyunda 42 qola sevinib.