https://mail.innews.az/uploads/news/2026-11/_innews_2d8e5f0d6e4867f72c576f0a1_o.jpg
Sabirabad "Gənclər evi" sosial xidmət müəssisəsinin direktoru Rəşad Qurbanovun rəhbərliyi və müəssisənin təşkilatçılığı ilə "8 Noyabr – Zəfər Günü"nə həsr olunmuş rəsm sərgisi təşkil edilib.
Vətən müharibəsində qazanılmış tarixi Qələbənin mahiyyətinin gənc nəslə çatdırılması, şəhidlərimizin əziz xatirəsinin yaşadılması və vətənpərvərlik dəyərlərinin incəsənət vasitəsilə təbliği məqsədi daşıyan sərgidə Sabirabad "Gənclər evi" sosial xidmət müəssisəsinin direktoru Rəşad Qurbanov, “Əminlər” şirkətinin və “İlğım” ədviyyat markasının qurucusu Məmməd Mənsimov, Vətən Müharibəsi Veteranları Birliyinin Sabirabad rayon şöbəsinin sədri Faiq Hüseynov, şəhid ailələrinin üzvləri və digər qonaqlar iştirak ediblər.
Tədbirdə çıxış edən Rəşad Qurbanov "8 Noyabr – Zəfər Günü"nün Azərbaycan xalqının çoxəsrlik dövlətçilik tarixində xüsusi yer tutduğunu vurğulayaraq, bu tarixi Qələbənin xalqımızın birliyinin, milli iradəsinin və Azərbaycan Ordusunun qəhrəmanlığının nəticəsi olduğunu bildirib. Direktor qeyd edib ki, şəhidlərimizin qəhrəmanlıq salnaməsinin gələcək nəsillərə çatdırılması, gənclərdə Vətənə sevgi və milli-mənəvi dəyərlərə bağlılığın gücləndirilməsi hər birimizin qarşısında duran mühüm vəzifələrdəndir.
Digər çıxışlarda da 44 günlük Vətən müharibəsində xalqımızın nümayiş etdirdiyi birlik və həmrəylikdən, Azərbaycan Ordusunun şücaətindən, tarixi Zəfərin əhəmiyyətindən və şəhidlərimizin əvəzsiz fədakarlığından bəhs olunub. Şəhidlərimizin əziz xatirəsi ehtiramla yad edilib.
Sərgidə nümayiş etdirilən rəsm əsərlərində Zəfərimizin möhtəşəmliyi, Vətən sevgisi, milli qürur, qəhrəmanlıq və azad edilmiş torpaqlarımıza bağlılıq öz əksini tapıb. Gənc rəssamların yaradıcılıq nümunələri iştirakçılar tərəfindən maraqla qarşılanıb.
Qeyd edək ki, sərginin təşkilində əsas məqsədlərdən biri gənclərin yaradıcılıq potensialının üzə çıxarılması ilə yanaşı, onların milli tariximizə, qəhrəmanlıq salnaməmizə və Vətənimizin taleyinə daha yaxından bağlılığının təmin edilməsidir. Rəşad Qurbanovun rəhbərlik etdiyi müəssisə bu istiqamətdə həyata keçirdiyi tədbir və təşəbbüslərlə gənclərin sosial və mənəvi inkişafına töhfə verməyi qarşıya məqsəd qoyur.
Tədbirin sonunda M. Ə. Sabir adına 1 saylı ümumi orta məktəbin müəllimi Ağazadə Seyitfatimə sərginin təşkilinə göstərdiyi dəstəyə görə təşəkkürnamə ilə təltif olunub.
Zəfərimiz əbədi, qəhrəmanlarımız daim qəlbimizdədir!
Ən son xəbərləri səhifəmizdən də izləyin
