Kompüterləri sıradan çıxaran xəstəliyin əməliyyatı tibbi sığorta ilə qarşılanırmı?

Kompüterlə işləyən minlərlə insan üçün hiperhidroz (həddindən artıq tərləmə) xəstəliyi həm bahalı texnikanın sıradan çıxmasına, həm də iş yerlərinin itirilməsinə səbəb olur.

İnsan tərinin tərkibindəki yüksək duz və turşular klaviaturadan sızaraq daxili mikro-sxemlərdə qısaqapanma yaradır. Xüsusilə noutbuklarda klaviaturanın altında ana plata yerləşdiyi üçün sızan tər cihazı tamamilə yandırır. Eyni zamanda sensor panellər (Touchpad) və siçanlar (Mouse) rütubətdən iflic olur. Nəticədə proqramçılar, mühasiblər və ofis işçiləri normal iş tempini itirərək peşələrindən uzaqlaşmaq məcburiyyətində qalırlar.

Bütün bu fəsadlara baxmayaraq, Azərbaycanda tərləmə əleyhinə cərrahi əməliyyatlar (Endoskopik Torakal Simpatektomiya – ETS) İcbari Tibbi Sığortanın Xidmətlər Zərfinə daxil deyil və yalnız ödənişli əsaslarla icra olunur.

Qardaş Türkiyənin Sosyal Güvenlik Kurumu (SGK) rəsmi xidmət siyahısında bir və ya hər iki ayaqda tərləmənin müalicəsi üçün icra olunan lomber simpatektomiya əməliyyatları 616240 və 616250, əl və qoltuqaltı tərləməsinə qarşı təktərəfli və ikitərəfli tətbiq edilən torakal simpatektomiya prosedurları isə 616290 və 616300 kodları ilə sığorta təminatı altına alınıb.

Qeyd edək ki, bir çox dünya ölkələrində hiperhidrozun cərrahi əməliyyatı dövlət sığortası tərəfindən qarşılanır.

Vüsal