https://mail.innews.az/uploads/news/2026-11/_innews_06c9fbaa8054ce5f925afcad9_o.jpg
Azərbaycan 2016-cı illə müqayisədə dayanıqlı bazar iqtisadiyyatının bir sıra əsas göstəriciləri üzrə irəliləyiş əldə edib. Bununla belə, inteqrasiya meyarı üzrə ölkənin nəticəsi son on ildə aşağı düşüb.
"innews media" xəbər verir ki, bu barədə Avropa Yenidənqurma və İnkişaf Bankının (AYİB) “Transition Report 2026” adlı keçid hesabatında dayanıqlı bazar iqtisadiyyatının altı əsas xüsusiyyəti üzrə aparılan qiymətləndirmədə qeyd olunub.
Azərbaycanın 2026-cı il üzrə göstəriciləri
Hesabata əsasən, 2026-cı ildə Azərbaycanın rəqabət qabiliyyəti meyarı üzrə nəticəsi 4,51 bal təşkil edib. Bu göstərici 2016-cı ildə 4,31 bal olub.
Dövlət idarəçiliyinin keyfiyyəti üzrə Azərbaycanın nəticəsi 5,89 bal qeydə alınıb. Bu, 2016-cı ilin 5,36 ballıq göstəricisi ilə müqayisədə 0,53 bal artım deməkdir.
Ekoloji dayanıqlılıq meyarı üzrə ölkənin göstəricisi 2016-cı ildəki 4,79 baldan 2026-cı ildə 5,31 bala yüksəlib. İnklüzivlik kateqoriyasında isə Azərbaycanın nəticəsi 5,28 bal olub. On il əvvəl bu göstərici 4,93 bal səviyyəsində qeydə alınıb.
Xarici və daxili sarsıntılara davamlılıq meyarı üzrə Azərbaycanın qiymətləndirməsi də artıb. Belə ki, göstərici 2016-cı ildəki 3,55 baldan 2026-cı ildə 3,80 bala çatıb.
İnteqrasiya göstəricisi geriləyib
Digər meyarlardan fərqli olaraq, inteqrasiya kateqoriyasında Azərbaycanın nəticəsi aşağı düşüb. 2016-cı ildə 5,62 bal təşkil edən göstərici 2026-cı ildə 5,08 bala enib.
Beləliklə, hesabatın əhatə etdiyi altı əsas xüsusiyyətdən beşi üzrə Azərbaycanın nəticəsi 2016-cı illə müqayisədə yüksəlib, inteqrasiya meyarı üzrə isə azalma qeydə alınıb.
2025-ci illə müqayisədə dəyişikliklər
2025-ci illə müqayisədə ən nəzərəçarpan artım dövlət idarəçiliyinin keyfiyyəti üzrə müşahidə olunub. Bu meyar üzrə Azərbaycanın göstəricisi 5,85 baldan 5,89 bala yüksəlib.
Rəqabət qabiliyyəti üzrə nəticə 4,50 baldan 4,51 bala artıb. Ekoloji dayanıqlılıq, inklüzivlik və xarici və daxili sarsıntılara davamlılıq göstəricilərində isə dəyişiklik olmayıb.
İnteqrasiya kateqoriyası üzrə qiymətləndirmə 2025-ci ildəki 5,10 baldan 2026-cı ildə 5,08 bala düşüb.
Ən son xəbərləri səhifəmizdən də izləyin