https://mail.innews.az/uploads/news/2026-11/_innews_6eb8fbd2f5835d3f7b3910d1a_o.jpg
18–21 noyabr 2026-cı il tarixlərində Lənkəran şəhərində ilk dəfə olaraq I Lənkəran Beynəlxalq Film Festivalı ("Festival de Lankon") keçirilir. Regionda kino sənətinin inkişafına töhfə vermək və beynəlxalq mədəni mübadiləni gücləndirmək məqsədilə təşkil olunan festival dörd gün boyunca kino ictimaiyyətini və tamaşaçıları bir araya gətirəcək.
Festivalın əsas mükafatı "Qızıl Limon"dur. Müsabiqə proqramına 7 ölkənin istehsalı olan 26 qısametrajlı bədii, sənədli və animasiya filmi daxil edilib. Seçilmiş ekran əsərləri 11 nominasiya üzrə mübarizə aparacaq. Bundan əlavə, festival çərçivəsində müsabiqədənkənar film nümayişləri də təqdim olunacaq.
Tədbirin fəxri prezidenti kinorejissor Mirsadıq Ağazadə, direktoru rejissor və prodüser İntiqam Hacılı, prodüseri isə Şahin Hüseynlidir.
Müsabiqə filmlərini kino mütəxəssislərindən ibarət əsas münsiflər heyəti qiymətləndirəcək. Jürinin sədri kino-tənqidçi Aygün Aslanlı, üzvləri isə kinoşünas Sədaqət Kamal, ssenarist Ramil Ələkbərov, kinorejissor Pərviz Həsənov və yazar-dramaturq Şəfahət Şəfidir.
Festivalda həmçinin Lənkəranın yaradıcı ziyalılarından ibarət xüsusi "Festival de Lankon" münsiflər heyəti də fəaliyyət göstərəcək. Bu heyətdə aktyorlar Əbülfəz Axundov, Allahverən Babayev, aktrisa Qızılgül Quliyeva və rejissor Təvəkkül Həsənov təmsil olunurlar.
Nümayiş proqramı və məkan:
* 18 noyabr — saat 14:00
* 19 noyabr — saat 12:00
* 20 noyabr — saat 16:00
* 21 noyabr — saat 10:00
Bağlanış mərasimi: 21 noyabr, saat 14:30
Ünvan: Paus kafesinin kiçik zalı (Qala Xiyabanı 3)
Qaliblərin adları noyabrın 21-də baş tutacaq bağlanış mərasimində elan ediləcək və onlara "Qızıl Limon" mükafatı və diplomlar təqdim olunacaq.
Ən son xəbərləri səhifəmizdən də izləyin