https://mail.innews.az/uploads/news/2023-01/_innews_1ac975dd8a79de80426da15c0_o.jpg
Azərbaycan Respublikası Elm və Təhsil Nazirliyi akademik Əli Quliyev adına Aşqarlar Kimyası İnstitutu (AKİ) ilə Bakı Dövlət Universitetinin (BDU) elmlə təhsilin inteqrasiyası istiqamətində səmərəli əməkdaşlığı davam edir.
AKİ-nin icraçı direktoru, kimya elmləri doktoru Əfsun Sucayevin və BDU-nun Analitik kimya kafedrasının müdiri, kimya elmləri doktoru, professor Famil Çırağovun birgə elmi rəhbərlik etdiyi doktorant Tahir Cavadzadənin apardığı elmi tədqiqatların mühüm nəticələri “Web of Science” bazasında arxivləşdirilən “Polyhedron” jurnalında (https://doi.org/10.1016/j.poly.2022.116274) dərc olunub. Qeyd edək ki, “Elsevier” nəşriyyatının “Polyhedron” jurnalının impakt faktoru 3.052-yə bərabərdir.
Məqalə N-əvəzli tiokarbamid və onların metal komplekslərinin sintezi, quruluşlarının müasir fiziki-kimyəvi üsullarla müfəssəl tədqiqinə həsr edilib. Bu birləşmələrin sabit strukturlarını xarakterizə edən həndəsi, enerji və elektron parametrləri müəyyən edilib, Funksional Sıxlıq nəzəriyyəsi əsasında sərhəd molekulyar orbitalların enerjiləri, enerji boşluğu, kimyəvi reaktivlik deskriptorları, atom yükləri, dipol momenti və qütbləşmə qabiliyyəti hesablanıb, həmçinin reagent və kompleks üçün molekulyar qarşılıqlı təsirlərin baş verə biləcəyi elektrofil və nukleofil bölgələrin yerləri müəyyən edilib, elektron sıxlığının ötürülməsi və hiper konyuqativ qarşılıqlı təsirlər aydınlaşdırılıb. Müəyyən edilib ki, tiokarbamid və onun kompleksinin təklif olunan modellərinin təcrübi və nəzəri cəhətdən əldə edilmiş parametrləri üst-üstə düşür. Eyni zamanda, sintez edilmiş birləşmələrin antioksidant xüsusiyyətləri model reaksiyalarında tədqiq edilib. Məlum olub ki, bu birləşmələr sürtkü materialların oksidləşməsinə qarşı yüksək inhibitor xassəyə malikdirlər.
Ən son xəbərləri səhifəmizdən də izləyin
