"20 Yanvar şəhidlərinin qəhrəmanlığı Azərbaycan gəncləri üçün örnəkdir"

Bakı Dövlət Universitetinin (BDU) Biologiya fakültəsində 20 Yanvar - Ümumxalq Hüzn Gününə həsr olunmuş tədbir keçirilib. Fakültənin dekanı Afət Məmmədova qeyd edib ki, qan yaddaşımıza əbədi həkk olunmuş 1990-cı ilin 20 Yanvar hadisələri tariximizin faciə və qəhrəmanlıq səhifəsi, Azərbaycanın sonrakı taleyinə əhəmiyyətli təsiri olan dönüş anıdır. Bu faciə xalqımızın azadlıq, demokratiya və suverenlik uğrunda apardığı mübarizənin dönməzliyini bütün dünyaya nümayiş etdirdi.

BDU-nun Tələbə Həmkarlar İttifaqı Komitəsinin sədri Hacıbaba Mustafayev isə bildirib ki, 20 Yanvar şəhidlərinin qəhrəmanlığı Azərbaycan gəncləri üçün örnəkdir. Gələcək nəsillər şəhidlərin qəhrəmanlığından nümunə götürəcək, azadlıq və müstəqilliyimizi qorumaq üçün daim mübarizədə olacaqlar.

Qarabağ müharibəsinin iştirakçısı, ilk kəşfiyyatçı qadın Növrəstə Yusifova, Botanika və bitki fiziologiyası kafedrasının dosenti Sevda Tahirli çıxışlarında bu qanlı faciənin xalqımızın azadlıq eşqini söndürə bilmədiyini, iradəsinin sarsılmazlığını, mətinliyini göstərdiyini qeyd ediblər. Tədbirin sonunda fakültənin tələbə təşkilatlarının fəallarının ifasında şeirlər səsləndirilib.