Huşunu itirdi, xəstəxanaya yerləşdirildi

“Bayern”in çalışdırıcısı Vensan Kompani əvəzedici komandanın məşqi zamanı özünü pis hiss etdiyi üçün xəstəxanaya yerləşdirilib.

Belçikalı mütəxəssis helikopterlə Münhendəki klinikalardan birinə çatdırılıb. Klub 40 yaşlı məşqçinin səhhəti ilə bağlı rəsmi açıqlama yayıb:

“Dünən əvəzedici komandanın məşqi zamanı Kompani huşunu itirdiyi üçün tibbi yardıma ehtiyac duyub. Əsas komandanın baş məşqçisi həmin vaxt əvəzedici heyətin məşqində iştirak edirdi.

Kompani xəstəxanada ətraflı müayinədən keçir və həkimlərin nəzarəti altındadır. Bu müddət ərzində məşqçilər heyəti bütün məşq və oyunla bağlı fəaliyyətlərə rəhbərlik edəcək”.

“Bayern”in idman məsələləri üzrə idarə heyətinin üzvü Maks Eberl də azarkeşlərə müraciət edib:

“Vensan Kompaninin səhhəti bizim üçün ən vacib məsələdir. “Bayern” olaraq, onun tezliklə sağalması üçün əlimizdən gələni edəcəyik. Kompaniyə bütün zəruri tibbi yardım və dəstək göstərilir.

Ona ehtiyac duyduğu qədər vaxt verəcəyik. Tam etibar etdiyimiz məşqçilər heyəti onun vəzifələrini icra edəcək. “Bayern”dəki hər kəs Vensana tezliklə sağalmağı arzulayır”.

“Bayern” sabah Bundesliqa çərçivəsində saat 20:30-da səfərdə “Frayburq”la qarşılaşacaq.