https://mail.innews.az/uploads/news/2026-11/_innews_d9f5fc44af7d0ff327e646e08_o.jpg
6–7 noyabr 2025-ci il tarixlərində Ailə, Qadın və Uşaq Problemləri üzrə Dövlət Komitəsinin tabeliyində fəaliyyət göstərən Şüvəlan Uşaq və Ailələrə Dəstək Mərkəzi və Mediasiya Şurasının təşkilatçılığı ilə mediatorlar üçün “Ailə münaqişələrində psixoloji yanaşmalar” mövzusunda ikigünlük təlim keçirilib.
Təlimdə ekspert və təlimçi qismində Mediasiya Şurasının üzvü, mediator və psixoloq Ülkər Zülfüqarova, eləcə də “Peşəkar Psixoloqlar” İctimai Birliyinin sədri, mediator və psixoloq Səbinə İsmayılova iştirak ediblər.
Təlimin əsas məqsədi mediatorların ailə münaqişələri zamanı psixoloji yanaşma bacarıqlarının təkmilləşdirilməsi, tərəflərin emosional vəziyyətinin və davranış xüsusiyyətlərinin daha dərindən anlaşılması, effektiv ünsiyyət və empatik dinləmə bacarıqlarının inkişaf etdirilməsi olub.
İki gün davam edən təlim çərçivəsində münaqişələrin emosional və dəyər əsasları, ailədaxili münasibətlərdə psixoloji mexanizmlər, rol dəyişkənliyi, açıq ünsiyyət, empatik dinləmə və mediatorun davranış strategiyaları müzakirə edilib. Nəzəri məlumatlarla yanaşı, simulyasiya və praktiki çalışmalar vasitəsilə iştirakçıların bilik və bacarıqlarının möhkəmləndirilməsinə xüsusi diqqət yetirilib.
Təlim zamanı Səbinə İsmayılova ailə münaqişələrinin həllində psixoloji amillərin nəzərə alınmasının, tərəflərin emosional ehtiyaclarının düzgün anlaşılmasının və mediatorun neytral mövqeyinin qorunmasının əhəmiyyətini vurğulayıb.
Qeyd edək ki, ikigünlük təlimdə ümumilikdə 15 mediator iştirak edib.
Bu cür təlimlər mediasiya sahəsində peşəkar bilik və bacarıqların artırılması, ailə münaqişələrinin həllində psixoloji yanaşmaların tətbiqi və mediatorların praktiki səriştələrinin gücləndirilməsi baxımından mühüm əhəmiyyət daşıyır.
“Peşəkar Psixoloqlar” İctimai Birliyi
Səbinə İsmayılova
İctimai Birliyin sədri, mediator və psixoloq
Ən son xəbərləri səhifəmizdən də izləyin
