https://mail.innews.az/uploads/news/2026-11/_innews_ef23cfab75462ce6e77ab3c14_o.jpg
Azərbaycan Respublikasının Gənclər Fondunun maliyyə dəstəyi, “ASAN Könüllüləri” Təşkilatının və “ASAN Müraciət” informasiya sisteminin tərəfdaşlığı ilə Pərviz Səmədovun təşəbbüsü əsasında həyata keçirilən “Gənclik 360 Platforması” layihəsi uğurla başa çatıb.
Layihə Azərbaycan Respublikasının Gənclər Fondunun gənclər təşkilatları və gənclər üçün inkişaf, innovasiya və sosial təşəbbüslər üzrə qrant müsabiqəsi çərçivəsində həyata keçirilir.
Layihə çərçivəsində Ağcabədi və Bərdə rayonlarından olan ümumilikdə 200 gənc aktiv vətəndaşlıq, rəqəmsal təhlükəsizlik, süni intellekt savadlılığı, inklüzivlik, ekoloji məsuliyyət və könüllülük istiqamətlərində təşkil olunan görüşlərdə iştirak edib.
Bağlanış mərasimində ilk olaraq layihənin icra müddətində həyata keçirilən fəaliyyətləri əks etdirən videoçarx nümayiş olunub. Daha sonra rəsmi qonaqların və təşkilatçıların çıxışları dinlənilib, layihənin əhəmiyyəti, gənclərin inkişafına verdiyi töhfə və region gəncləri üçün yaratdığı imkanlar vurğulanıb.
Layihə rəhbəri Pərviz Səmədov çıxışında bildirib ki, təşəbbüsün əsas məqsədi region gənclərini aktual mövzular ətrafında bir araya gətirmək, onların bilik və bacarıqlarının inkişafına, ictimai iştirakçılığının artırılmasına töhfə verməkdir. O, layihənin həyata keçirilməsində iştirak edən tərəfdaşlara, ekspertlərə və gənclərə təşəkkürünü bildirib.
Bağlanış mərasiminin xüsusi məqamlarından biri DOST İnklüziv İnkişaf və Yaradıcılıq Mərkəzinin Qarabağ “DOST Evi” şöbəsinin benefisiarları və təlimçisi tərəfindən hazırlanmış əl işləri və rəsm əsərlərindən ibarət sərgi olub. Sərgi iştirakçılara benefisiarların yaradıcılıq bacarıqları və əməyinin nəticələri ilə tanış olmaq imkanı yaradıb.
Tədbirin davamında layihənin həyata keçirilməsində fəallığı ilə seçilən gənclər və layihəyə dəstək göstərən tərəfdaşlar təşəkkürnamələrlə təltif olunublar.
Qeyd edək ki, “Gənclik 360 Platforması” region gənclərinin məlumatlılığının artırılması, ictimai fəallığının təşviqi və müxtəlif sahələr üzrə əməkdaşlıq imkanlarının genişləndirilməsi məqsədi daşıyan təşəbbüsdür.
Ən son xəbərləri səhifəmizdən də izləyin
