https://mail.innews.az/uploads/news/2026-11/_innews_fd98d4712ca6af9aad33c5ce6_o.jpg
Hörmətli prezident!
Yola saldığımız 2026-ci ildə Azərbaycan Milli Mətbuatımızın 150 illik yubileyi çox yüksək səviyyədə qeyd olundu. Qabaqcıl jurnalistlərə fəxri adlar verildi. Şadam ki, həmin diqqət və qayğıdan mənə də pay düşdü, media sahəsində göstərdiyim xidmətlərə görə mən də “Azərbaycan Milli Mətbuatının 150 illik yubileyi “ medalı ilə təltif olundum. Böyük minnətdarlıq hissi ilə qəbul etdiyim bu təltifat məni və sağlam əqidəli jurnalistlərdən ibarət kollektivimizi bundan sonar da bizə verilən yüksək dəyərə uyğun fəaliyyət göstərməyimizə sövq edir.
Cənab prezident!
Çoxillik jurnalistlik fəaliyyətimdə bir neçə mətbu orqanında məsul vəzifələrdə çalışmışam. Həmişə dövlətimiz, dövlətçiliyimiz uğrunda mübarizə aparanların ön sıralarında olmuşam. Azərbaycan milli-mənəvi dəyərlər sisteminin qorunub saxlanılmasında əlimdən gələni etmişəm və bu gün də edirəm.
Hörmətli prezident!
On il əvvəl müstəqil “Təhsil- press” informasiya agentliyini yaradarkən hiss etdim ki, Bakı Dövlət Universitetinin jurnalistika fakültəsinin məzunu olmağım, əlavə hüquq təhsili almağım və uzun illər topladığım təcrübə mənə bu məsuliyyətli işin öhdəsindən gəlməkdə kömək edəcək. Elə də oldu və fəaliyyətimizə dəyər verən sadiq oxucularımızın dəstəyi ilə “Təhsil- press” agentliyini ayaq üstə saxlaya bilmişik. Lakin bu yolda büdrəmədən irəliləməyimizə ən böyük maneə qarşılaşdığımız maliyyə çətinlikləridir. Etiraf etmək məcburiyyətindəyik ki, təkcə təltiflərlə, fəxri adlarla problemlərimiz düzəlmir. Qarşımızda isə böyük işlər durur.
Təhsilin dünyəvilik standartlarına qarşı çıxan ünsürlərlə mübarizədə öz sözümüzü demək istəyirik, müasir süni intellekt dönəmində əmək bazarının tələblərini təhsilalanlara çatdırmaq istəyirik. Maliyyə dəstəyi üçün səlahiyyətli dövlət qrumu olan Azərbaycan Respublikası Media və Yayım Şurasının sələfi - Medianın inkişafı Agentliyinə müraciət etsək də ümid etdiyimiz müsbət nəticəni əldə edə bilmədik. Sahəyə ayrılan maliyyə yardımlarının pay bölgüsündə həmişə eyni qəzet, jurnal və saytlar üstünlük əldə edirlər. Aldıqları vəsait hesabına nümayiş etdirdikləri performans onları növbəti il, növbəti pay bölgüsündə münsiflərə daha uğurlu göstərir. Dövlət dəstəyindən faydalanan həmkarlarımın peşəkarlığına şübhəm yoxdur. Ancaq peşəkarlıq cəmiyyətin güzgüsü olan mediada əsas olsa da, yeganə meyar deyildir. Belə təəssürat yaranır ki, dəstəyə layiq olanların, köməyə ehtiyac hiss edənlərin çərçivəsi sanki hansısa imperativ göstərişlə birdəfəlik müəyyən olunub və daha genişlənə bilməz.
Cənab prezident!
“Təhsil-press”informasiya agentliyinin fəaliyyətini davam etdirməsi üçün köməklik göstərməyinizi xahiş edirəm. Qabaqcadan minnətdarlığımı bildirirəm. Dərin hörmətlə:
Əkbər Hüseynzadə
“Təhsil-press” informasiya agentliyinin baş direktoru
Ən son xəbərləri səhifəmizdən də izləyin